Bu ilin mart ayında Moskvada vəfat edən Azərbaycan Kinematoqrafçılar İttifaqının (AKİ) sədri, kinorejissor Rüstəm İbrahimbəyovun sağlığında olduğu kimi, ölümündən sonra da AKİ ətrafında qalmaqallar davam edilir. Uzun illər AKİ-yə rəhbərlik edən R.İbrahimbəyovun Bakıdan çox Moskvada yaşadığı, təşkilatın qapısını ayda-ildə bir dəfə açdığı barədə çox danışılır.
Deyirlər ki, mərhum keçmiş sədr nadir hallarda AKİ-yə gəlib və əsas vaxtını öz layihələrinə həsr edib, müştərək filmlər çəkib, hətta ermənilərlə də işbirliyi yapıb. Yəni nə özünün, nə də rəhbərlik etdiyi qurumun kinomuza bir faydası, xeyri olub. Rüstəm müəllim müstəqil Azərbaycanın kinosunu inkişaf etdirmək, ona töhfələr vermək əvəzinə “Qafqaz üçlüyü” adlı film çəkib, üstəlik də, bu filmdə erməniləri yüksəldib, azərbaycanlıları aşağılayıb. 2018-ci ildə R.İbrahimbəyovun ssenarisi əsasında çəkilən və böyük hay-küy yaradan “Qafqaz üçlüyü” filmi son illər ermənipərəst dairələrin Azərbaycan dövlətinə və xalqına qarşı apardığı məqsədli iftira, qarayaxma kampaniyasının tərkib hissəsi olaraq ciddi tənqid edildi.
O dövrdə Mədəniyyət Nazirliyinin yaydığı bəyanatda bildirilirdi: “Ermənistanın Azərbaycana qarşı ərazi iddiaları və işğalçılıq siyasəti başlayan ilk gündən düşmən ölkənin, dünyadakı erməni lobbisinin bütün resursları Azərbaycan xalqını qəddar, davakar, ermənilərə qənim kəsilmiş bir xalq olaraq tanıtmağa və bununla Dağlıq Qarabağdakı separatçılığa əsas qazandırmağa yönəldilib. Təəssüf ki, bu işdə bəzi "sapı özümüzdən olan"lar da düşmənin məkrinə alət olaraq doğulduğu torpağa, mənsub olduğu xalqa qarşı çirkin fəaliyyət göstərirlər”.
Bildirilirdi ki, R.İbrahimbəyovun bu istiqamətdə fəaliyyəti artıq neçə illərdir davam edir və o, çoxdan tükənmiş "yaradıcılıq gücü"nü şəxsi maraqlar naminə erməni ünsürlərlə əlbir olaraq Azərbaycan xalqını aşağılamaq, onu mədəniyyətsiz, milli kökləri olmayan xalq kimi göstərmək yolunda sərf edir. Bu fikirlər mətbuat səhifələrində var və istəniən adam bunu tapıb oxuya bilər.
R.İbrahimbəyovun rəhbərlik etdiyi AKİ-də parçalanma prosesi “Qafqaz üçlüyü” filmindən bir neçə il əvvələ təsadüf edir. R.İbrahimbəyovun Azərbaycan kinosuna barmaqarası baxması bir sıra kino xadimlərinin ittifaqdan narazı düşməsinə səbəb olur, nəticədə isə 2012-ci ildə ittifaq parçalanır, kino xadimləri İbrahimbəyovun rəhbərlik etdiyi təşkilatı tərk etməyə başlayırlar. 2012-ci ildə AKİ uzun illər fəaliyyət göstərdiyi Hökumət Evindən çıxarılır. Onu da xatırladaq ki, 2012-ci ildə Vergilər Nazirliyi tərəfindən cinayət işi açılır və Nazirliyin müvafiq strukturları tərəfindən Azərbaycan Kinematoqrafçılar İttifaqında 01.06.2009-cu il tarixdən 01.01.2012-ci il tarixədək olan dövrü əhatə etməklə 20.11.2012-ci ildə keçirilən növbəti səyyar vergi yoxlaması nəticəsində vergi orqanına bəyannamə təqdim olunmamaqla xeyli miqdar təşkil edən 12373,56 manat məbləğində verginin dövlət büdcəsinə ödənilmədiyi aşkarlanaraq, fakt üzrə 27.12.2012-ci il tarixdə Vergi Cinayətlərinin İbtidai Araşdırılması Departamentində Cinayət Məcəlləsinin 213.1-ci maddəsi ilə cinayət işi başlanır... 2012-ci ilə aid olan bu məlumat da çoxlarına məlumdur. Hətta o da bəllidir ki, bir çoxları bu hadisəni siyasiləşdirməyə və guya siyasi basqı kimi qiymətləndirməyə başladılar. Lakin burada hər hansı bir siyasi not olmadığı məlumdur. Baş verənlər sadəcə AKİ sədrinin öz təşkilatına qeyri-ciddi münasibəti, orada kimlərinsə talançılıq etməsinə şərait yaratması idi. Dəfələrlə tanınmış kino xadimləri deyiblər ki, AKİ R.İbrahimbəyovun dövründə bir çoxları üçün yem yeri olub, çoxları bu quruma ayrılan pulları mənimsəyib. Rüstəm İbrahimbəyovun özünün də bu pulları mənimsədiyi haqda məlumatlar var. Baş verənlər də narazılığa rəvac verib.
2012-ci ildə AKİ-dən qopan nüfuzlu kino xadimləri dövlət qurumlarına artıq sıradan çıxmış AKİ-ni əvəzləyən bir kino təşkilatının yaradılmasına dəstək göstərmələri üçün müraciət ediblər. Nəticədə Azərbaycan Respublikası Kinematoqrafçılar İttifaqı yaranır. Belə bir ittifaqın yarandığını eşidən İbrahimbəyovun Moskvadan başılovlu Bakıya qayıtdığı və evində qurultay topladığı qeyd edilir. Bu gün Azərbaycan Respublikası Kinematoqrafçılar İttifaqı ilə paralel olaraq AKİ də fəaliyyət göstərir, uzun illər passiv mövqedə dayanan təşkilat İbrahimbəyovun ölümündən sonra yenidən canlanmağa başlayıb. Xalq artisti Rasim Balayevin AKİ sədrliyinə namizədliyi irəli sürüldüyü vaxtdan bəzi kino xadimləri buna tənqidi yanaşdılar və Balayevin vaxtilə R.İbrahimbəyovun reputasiyası zədələnən təşkilatına sədr olmasına qarşı çıxdılar. Şəxsən biz özümüz Rasim Balayevin sədr seçilməsinə mənfi yanaşmırıq və o bir kino xadimi, ziyalı kimi bu vəzifəyə tam layiqdir, kinoittifaqa onun kimi görkəmli simanın rəhbərlik etməsinə yalnız müsbət yanaşmaq olar. Əsas tənqid olunan məqam kiçik bir ölkədə iki kino ittifaqının olması və kino xadimlərinin parçalanmasıdır. Kino xadimləri də deyirlər ki, kino adamlarını məqsədli şəkildə İbrahimbəyov parçalayıb, onları qarşı-qarşıya gətirib, aralarına intriqa toxumu əkib. Bu gün iki ittifaqa ehtiyac yoxdur əlbəttə, uzun illər bir yerdə olan, filmlərə çəkilən, bir qabdan çörək yeyib su içən adamlar az qala bir-birinə düşmən kimi baxırlar. Son zamanlar da çoxları deyir ki, bunun baiskarı İbrahimbəyov olub. R.İbrahimbəyovun fəaliyyəti dövrü ilə bağlı yeni faktlar üzə çıxır. Mətbuatda yayılan məlumatlara görə, R.İbrahimbəyovun dövründə ittifaqın Mingəçevirdəki istirahət mərkəzi, “Domsovet”dəki otaqları əldən çıxıb. Onu da vurğulayaq ki, İttifaqın Mingəçevirdə yerləşən Yaradıcılıq Evinin sökülməsi ilə bağlı 2013-cü ildən AKİ Azinko ASC–yə qarşı məhkəmə iddiası qaldırıb. Bu barədə də məlumatlar var. Bəzi kino xadimləri iddia edirlər ki, R.İbrahimbəyov vaxtilə rəhbərlik etdiyi AKİ-ni çapıb-talayıb, bu qurumun varidatını mənimsəyib.
Mətbuatda bəzi etirazlar var ki, R.Balayev nə üçün R.İbrahimbəyovun reputasiyası zədəli ittifaqına sədr seçilməyə razılıq verib. Söhbət ondan getmir ki, R.Balayev kinoya rəhbərlik edə bilməz, əlbəttə, Rasim müəllim elə böyük sənətkar, elə böyük ziyalıdır ki, onun rəhbər vəzifədə olmasının yalnız kinoya faydası dəyə bilər.
Çoxları deyir ki, R.İbrahimbəyov dünya şöhrətli sənətkardır və sair. Yaxşı, bəs bu dünya şöhrətli kinorejissor nə üçün Qarabağın Azərbaycan ərazisi olduğu barədə bir film çəkib dünyaya yaymadı? Niyə Qarabağ həqiqətlərini lentə alıb dünyaya çıxarıb Azərbaycanın ədalətli mövqeyini bəşəriyyətə təqdim etmədi, əvəzində bədnam “Qafqaz üçlüyü” filminin ssenarisini yazıb xalqımıza xəyanət etdi... Əlbəttə, bunu unutmaq olmaz. Bu azmış kimi, 2013-cü ildə şirkətinin ermənilərin yaxın dostu Rəsul Həmzətov haqda film çəkdiyini də bəyan etdi. Onun əvəzinə Azərbaycanın ədalətli mövqeyini ifadə edən film çəkmək olmazdı? Gah siyasətçi, gah kinorejissor, gah kinodramaturq rolunda meydanda olan, dövlətimizə qarşı təhdid yolu tutan, xalqımıza qarşı hədyanlar yağdıran İbrahimbəyov kinomuza da ağır zərbə vurub. Xalq olaraq R.İbrahimbəyovun bir çox bəd əməllərinin şahidi olmuşuq. Başlıcası isə, ittifaqı dağıdıb, kino ictimaiyyətini parçalayıb. Onun vaxtilə etdiklərinin isə səsi bu gün çıxır, təbii, İbrahimbəyovpərəstlər bunu “qərəz”, “paxıllıq” olaraq qələmə verməyə çalışırlar. Kaş hər şey onlar düşündüyü kimi olaydı, təəssüf ki, elə deyil...
Əli TURABOV
