"Vəziyyət sadəcə çətin deyil, ağırdır və nəticələri daha da ağır olacaq. Bir çox insan, xüsusən də kiçik və orta ölçülü kənd təsərrüfatı biznesinin nümayəndələri artıq ciddi problemlər və borc öhdəlikləri ilə üzləşirlər. İqtisadiyyata bu cür yanaşmaq qəbuledilməzdir".
Bunu Ermənistanın keçmiş kənd təsərrüfatı nazirinin müavini Aşot Harutyunyan Rusiyanın Ermənistan kənd təsərrüfatı məhsullarının idxalına tətbiq etdiyi məhdudiyyətləri şərh edərkən bildirib.
Harutyunyanın sözlərinə görə, mövcud vəziyyətin həlli asan olmayacaq: "İnsanlara yaranan çətinliklərin öhdəsindən gəlməyə kömək etmək üçün praktik təcrübəyə əsaslanan balanslı, səriştəli addımlar atmalıyıq. İstehsalçıları - fermerləri və kənd təsərrüfatı istehsalçılarını dəstəkləmək xüsusilə vacibdir ki, onlar məhsullarını sata bilsinlər. Dövlət birbaşa və effektiv dəstək verməlidir, çünki mövcud şəraitdə bu, həlledici amil ola bilər. İstehsalçıların məhsullarını istehlakçılara çatdıra bilməsi üçün şərait yaratmalıyıq. Bu halda həm yüksək keyfiyyətli və əlverişli qiymətə ərzaq məhsulları alacaq şəhər sakinləri, həm də əməyinə görə ədalətli gəlir əldə edə biləcək istehsalçıların özləri faydalanacaqlar. Xüsusilə tez xarab olan kənd təsərrüfatı məhsullarının - ərik, albalı və digər meyvələrin vaxtında tədarükünün təşkili vacibdir. Məhsulun emal müəssisələrinə ixrac bazarlarındakı məhsulların qiyməti ilə ən azı müqayisə edilə bilən qiymətə çatdırılmasını təmin etmək lazımdır".
Lakin Harutyunyan vurğulayır ki, təəssüf, bu cür sistemli tədbirlər hələ tətbiq olunmayıb. Ermənistanda daxili bazardakı qiymətlərə gəldikdə, keçmiş nazir müavini hesab edir ki, bunlar kənd təsərrüfatı məhsullarının maya dəyərindən ən azı bir qədər yuxarı satıla biləcəyindən asılı olacaq: "Dövlət bu məhsulların satışını təmin etməlidir, lakin prosesi elə təşkil etmək vacibdir ki, istehsalçılar onları maya dəyərinə nisbətən ən azı minimal mənfəətlə sata bilsinlər. Əks təqdirdə, məhsul sadəcə ağaclarda və kollarda qalacaq, çünki fermerlər, hətta xərclər ödənilmədikdə belə, müəyyən kompensasiya və gəlir olmadan əlavə xərcləri daşıya bilməyəcəklər. Məhsul yığımını təşkil etmək, kənd təsərrüfatı istehsalçılarını dəstəkləmək və istənilən meyvənin yığılmamış qalmasının qarşısını almaq lazımdır. Bu yolla şəhər sakinləri yüksək keyfiyyətli kənd təsərrüfatı məhsulları alacaq və fermerlər mövcud fövqəladə vəziyyətdən sağ çıxmalarına kömək edəcək az da olsa gəlir əldə edəcəklər". Onun sözlərinə görə, bunlar mövcud böhrana cavab vermək üçün yalnız müvəqqəti tədbirlərdir, uzunmüddətli həll isə fərqli yanaşmalar tələb edir: "Kənd təsərrüfatı məhsullarının tədarükü və ixracı ilə bağlı problemlər gələcəkdə ciddi nəticələrə səbəb ola bilər. Bu vəziyyəti həll etmək üçün səriştəli danışıqlar aparmalı, ortaya çıxan məsələləri düzgün həll etməli və dostlarımızı itirməməliyik".
Tahir TAĞIYEV
