Las-Veqasda qətliam törədən Stiven Paddok pensiyaya çıxana qədər mühasib işləyib. Hazırda isə özü və Florida ştatında yaşayan anasına məxsus bir neçə evi kirayəyə verməklə dolanırmış.
Baki-xeber.com-un xəbərinə görə, bu barədə polisə qatilin qardaşı Brayan Paddok deyib. Bildirib ki, baş verən hadisə asteroid kimi ailələrinin üzərinə çöküb, çünki təbiətcə sakit qardaşından heç vaxt belə əməl gözləməyiblər. Brayan hətta qardaşında odlu silahın olmasından da heyrətlənib. Las-Veqasın şerifi Cosef Lombardo isə keçirdiyi mətbuat konfransında bəyan edib ki, Stiven Paddokun evində aparılan axtarış zamanı 18 ədəd odlu silah, partladıcı maddə və patronlar aşkarlanıb. Onun sözlərinə görə, həmçinin cinayətkarın avtomobilindən ammonium-nitrat maddəsi tapılıb. Qeyd edək ki, ammonium-nitrat maddəsindən bomba hazırlanmasında istifadə olunur.
CBS telekanalının məlumatına görə, 64 yaşlı Stiven Paddok altı illik evlilikdən sonra 1990-cı ildə arvadından boşanıb. Cütlüyün övladı olmayıb. 2015-ci ildə Meskit şəhərində (Texas ştatı) ev alan S.Paddok Meril Denli adlı qadınla birgə yaşayıb. S. Paddokla 62 yaşlı qadın arasında rəsmi nikah olmayıb. Həmçinin Stiven Paddokun vaxtilə “Lockheed Martin” aerokosmik korporasiyasında işlədiyi üzə çıxıb. Şirkət artıq S. Paddokla bağlı istintaqa müvafiq xidməti sənədləri təqdim etməyə hazır olduğunu bəyan edib. Paddokun həmçinin iki yüngül mühərrikli təyyarəsinin də olduğu bildirilir. Lakin o da qeyd olunur ki, onun psixi problemlərinin olması barədə də məlumatlar var.
Las-Veqas qatili barəsində üzə çıxan daha bir detal da onun psixi problemlərinin olduğunu təsdiqləyir. Belə ki, 2012-ci ildə o, Las-Veqasdakı “Cosmopolitan” mehmanxana kompleksini məhkəməyə verib. Səbəbsə o olub ki, qaldığı nömrənin döşəməsində maneə olub və o həmin maneəyə ilişərək yıxılıb... İki il sonra – 2014-cü ildə hər iki tərəfin razılığı ilə məhkəmə işə xitam verib.
