Onu başqalarından, bəzi hallarda da həmkarlarından fərqləndirən əsas cəhət təşəbbüskar və əzmkar olmasıdır. Özünün də dediyi kimi, hələ lap uşaqlıqdan ona tapşırılan bütün işlərdə mütləq nəsə bir yenilik etməli olurmuş.
Gürcüstan Respublikası Bolnisi rayonunun Arxılı kəndində dünyaya gəlsə də, sonradan ailəsi ilə birlikdə Azərbaycana köçürlər. Orta məktəbi bitirdikdən sonra Azərbaycan Texniki Universitetinə daxil olub. 2004-2005-ci illərdə Sərhəd Qoşunlarının Xüsusi Təyinatlı Bölüyündə hərbi xidmət keçib. 2005-ci ilin noyabrında Diplomatik Nümayəndəliklərin Mühafizəsi üzrə Əlahiddə Polis Taborunda polis nəfəri kimi xidmətə başlayıb. 2007-2011-ci illərdə Polis Akademiyasında qiyabi təhsil alıb. Akademiyanı bitirdikdən sonra Nərimanov RPİ-nin 16-cı Polis Bölməsində sahə inspektoru vəzifəsinə təyin olunub. Bir müddət sonra 18-ci PB-də xidmətini davam etdirir. 2016-cı ildən Nizami RPİ 24-cü PB-də sahə inspektoru vəzifəsinədə çalışır.
Doğrusu, polis baş leytenantı Elxan Əliyevin xoş sorağını və xidmətində etdiyi təşəbbüskarlığın sorağını eşidəndə onunla yaxından tanış olmaq və sizlərə də tanıtmaq istədim. Elə bu istəklə ilk olaraq Nizami RPİ-nin rəisi, polis polkovniki Ədalət Abbasovla görüşdüm, fikrini öyrəndim. Ədalət Abbasov da onun məsuliyyətli və çalışqan bir zabit olduğundan, işində etdiyi yeniliklərin idarənin ümumi göstəricilərinə müsbət təsir göstərdiyindən söz açdı.
Yazımın qəhrəmanı Təşkilati inispeksiya qrupunun baş inspektoru, polis mayoru Rəhman İsmayılovun yanında məni gözləyirdi. Tanış olduq. Yeri gəlmişkən, Rəhman İsmayılov gənc həmkarımız haqqında xoş sözlər deməklə yanaşı, onun İslam Həmrəyliyi Oyunlarında xidmətdə fəqləndiyinə görə DİN rəhbərliyi tərəfindən «Fəxri fərman»la təltif olunduğunu da bildirdi.
Elxan Əliyevlə xidməti ərazidəyik. Səliqə-səhman elə xidməti otağından başlayır. Xidmətin keyfiyyətli aparılması üçün məntəqə bütün lazimi texniki avadanlıqlarla təchiz olunub,
Yeri gəlmişkən, ölkə başçısı, Ali Baş Komandan cənab İlham Əliyevin 2004-cü ilin iyulun 30-da təsdiq etdiyi “Azərbaycan Respublikasında polis orqanlarının fəaliyyətinin təkminləşdirilməsinə dair Dövlət Proqramı” çərçivəsində layihələrdən biri olan “Təhlükəsiz şəhər” sistemi quraşdırılmışdır. Sistemin məqsədi insan və vətəndaş hüquq və azadlıqlarını, əhalinin təhlükəsizliyini, dövlətin, fiziki və hüquqi şəxslərin qanuni mənafelərini hüquqazidd əməllərdən qorumaqdır. Təyinatı isə paytaxtda hüquq qaydasına riayət edilməsinə nəzarətin müasir informasiya-kommunikasiya texnologiyaları, o cümlədən videomüşahidə vasitəsilə həyata keçirilməsi, fasiləsiz şəkildə canlı izlənilməsi, qanunazidd hallara, fövqəladə vəziyyətlərə çevik reaksiya verməkdir. Şəhərimizin müxtəlif yerlərində bu kameralar quraşdırılsa da bəzi məhəllə və arxa küçələrdə buna ehtiyac duulmaqdadı.
Həmsöhbətimdən öyrəndim ki, hələ 16-cı PB-də işləyən zaman öz təşəbbüsü ilə xidmət apardığı ərazidə müşahidə kameralarının quraşdırılmasına başlayıb. Elə həmin kameraların köməyi ilə də mənzillərdən çoxsaylı oğurluqlar törədən Gürcüstan vətandaşlarından ibarət beş nəfərlik mütəşəkkil dəstəni zərərsizləşdirmək mümkün olub. Elxan Əliyevə Bakı Şəhər BPİ-nin rəhbərliyi tərəfindən təşəkkür elan olunub. 18-ci PB-də isə vətəndaşların su nasoslarını oğurlayan dəstə E. Əliyevin təşəbbüsü ilə quraşdırılan kameraların görüntüləri əsasında müəyyən edilib.
“Xalqlar dostluğu” metro stansiyasının 2 çıxışındakı ticarət obyektlərinin, eləcə də ərazidə yerləşən üç böyük ticarət mərkəzinin müxtəlif yerlərinə müşahidə kameraları yerləşdirilib. Həmin kameraların texniki imkanlarından istifadə olunaraq bu ilin may ayında ərazidə yerləşən mağazalardan birində baş vermiş quldurluğun üstü açılıb, hadisəni törədənlər çox keçmədən yaxalanaraq istintaqa təhvil veriliblər. Bir neçə digər oğurluğun üstü elə gənc polis baş leytenantının təşəbbüsü ilə quraşdırılan videokameraların görüntüləri sayəsində açılıb.
“«Laçın” Ticarət Mərkəzində, alıcıların daha çox olduğu yerlərdə çoxlu sayda kamera quraşdırılıb. Mağaza sahiblərinin dediklərindən aydın olur ki, bu kameralar ərsəyə gələnəcən onlara da xeyli ziyan dəyirmiş.
Elxan Əliyev bildirdi ki, əhali və sahibkarlarla mütamadi proflaktiki söhbətlər aparılır, polis-vətəndaş münasibətlərinin sıx olmasının vacibliyi onlara izah olunur.
İş bununla da bitmir. Hazırda Babək pospekti 95 ünvanın da kameralaşma işləri davam etdirilir. Paqondaşım deyir ki, əsas məqsəd baş verə biləcək cinayətlərin qarşısını vaxtında almaq, əhaliyə dəyə biləcək ziyana yol verməməkdir.
Çingiz Şıxverdiyev polis polkovnik-leytenantı
