Mayın 21-də axşam saatlarında Xəzər rayonunun Qala qəsəbəsindəki "Stansiya" adı ilə tanınan ərazidən keçənlər iki nəfərin mübahisəsinə ayaq saxlamalı olub. Qısa mübahisə əlbəyaxa davaya çevrilib və tərəflərdən birinin digərinə bıçaq zərbəsi vurması ilə nəticələnib. Hadisəni törədən isə qaçaraq aradan çıxıb.
Ətrafa toplaşanlar təşviş içində nə edəcəklərini bilmirdilər. Yerə uzanıb qalmış, ətrafı qan gölməçəsinə dönmüş yaralıya təcili yardım etmək lazım idi. Sakinlərdən biri o biri küçədən keçən polis maşınını görcək tez ona yaxınlaşaraq yardım istəyib.
Əlahiddə Çevik Polis Alayının əməkdaşları - polis serjantları Yavər Rəcəbov və İntiqam Manafov vaxt itirmədən hadisə yerinə gəlib yaralı Rövşən Ağayevi təcili xəstəxanaya göndəriblər.
Vətəndaşlar hadisəni törədənin qaçdığı səmti nişan verib. Polis əməkdaşları dərhal həmin istiqamətdə axtarış tədbirlərinə başlayaraq ətraf küçələri, döngələri diqqətlə axtarıb. Birdən köynəyi cırılmış, qan-tərin içində olan bir nəfər diqqəti cəlb edib. Üst-başındakı qan izlərindən həmin adam daha çox şübhə doğurduğundan onu saxlayıblar. Bakı şəhər sakini Zaur İsmayılov olduğu müəyyən edilən həmin şəxs hadisəni törətdiyini etiraf edib. Polis əməkdaşlarının iştirakı ilə cinayətin aləti olan bıçaq onun tulladığı yerdən tapılaraq götürülüb.
Sonrakı araşdırmaların aparılması üçün Z.İsmayılov Xəzər Rayon Polis İdarəsinin 1-ci Polis Bölməsinə təhvil verilib.
Hadisə barədə Əlahiddə Çevik Polis Alayının bölük komandiri, polis mayoru Fikrət Abdullayev bildirdi ki, hər iki əməkdaş ekstremal vəziyyətdə düzgün qərar qəbul etməklə cinayət hadisəsinin vaxtında açılmasına nail olub. Bu işdə vətəndaşların polisə dəstəyi, vaxtında müraciətinin də xüsusi əhəmiyyəti olub.
Baki-xeber.com
