Qadir Bayramlı: “Məhsulun itkisiz yığılması texnikanın yetərli səviyyədə olmasına bağlıdır”
Prezident İlham Əliyev Nazirlər Kabinetinin 2017-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında yeni kənd təsərrüfatı texnikasının alınması üçün 160 milyon manat vəsait nəzərdə tutulduğunu bildirib. Ölkə başçısı qeyd edib ki, buraya əsasən taxılbiçən, pambıqyığan kombaynlar, traktorlar, qoşqular, digər avadanlıq daxildir.
Prezident kənd təsərrüfatının inkişafı üçün dövlət dəstəyinin vacibliyini vurğulayaraq deyib ki, kənd təsərrüfatı dövlətin dəstəyi olmadan inkişaf edə bilməz: “Bunu hamı bilməlidir. Əlbəttə ki, rentabellik olmalıdır. Bəzi sahələr rentabelli sahələrdir, bəzi sahələr subsidiya hesabına yaşamalıdır. Bu, inkişaf etmiş ölkələrdə də belədir. Orada da subsidiyalar var, orada da dövlət fermerləri dəstəkləyir ki, ərzaq təhlükəsizliyi təmin edilsin, iş yerləri yaradılsın. Biz də bu yolla gedirik. Ona görə əgər hansısa kənd təsərrüfatı sahəsində istehsal o qədər də rentabelli deyilsə, bu, böyük faciə deyil, bundan faciə düzəltmək lazım deyil. Dövlət ilkin mərhələdə öz dəstəyini göstərir, bundan sonra hər şey yoluna düşəcək. Necə ki, biz indi kənd təsərrüfatının istehsalında bu artımı görürük”.
Prezident qeyd edib ki, əgər dövlət lazım olan vaxtda öz dəstəyini göstərməsəydi, bu gün kənd təsərrüfatında 4,1 faiz artımdan söhbət belə gedə bilməzdi və əksinə, bəlkə də bu sahə tənəzzülə uğrayardı. “Biz indi meliorativ tədbirlər də görürük. Biz unudulmuş sahələri də bərpa edirik”.
Ümumilikdə, kənd təsərrüfatı texnikasının alınması üçün 160 milyon manat vəsaitin ayrılmasına ekspertlər necə yanaşırlar? Bu, məhsul istehsalına necə təsir göstərəcək?
Məsələyə münasibət bildirənAzərbaycan Dövlət İqtisad Universitetinin dosenti Qadir Bayramlı buna müsbət prizmadan yanaşdı: “Nəzərə almaq lazımdır ki, Azərbaycanda kənd təsərrüfatı texnikasının böyük əksəriyyəti xaricdən gətirilir. Ən sadə kənd təsərrüfatı alətləri yeni-yeni istehsal edilir. Azərbaycan müstəqillik əldə etdikdən sonra bu sahədə böhran yarandı, müəyyən çatışmazlıqlar ortaya çıxdı. O vaxtlar aran rayonlarında taxıl erkən biçilirdi, sonra dağətəyi rayonlara keçirdilər. Çünki texnika çatışmırdı. Digər bir sıra çətinliklər var idi. Azərbaycanda “Aqrolizinq” təşkl edildikdən sonra bu sahədə vəziyyət xeyli düzəldi, amma tam yetərli səviyyədə deyil. Yenə də bəzi rayonlar sovet dönəmindən qalmış texnikanı çətinliklə də olsa işlədirlər. Bəzən məhsul biçini zamanı texnika çatmır. Nəticədə məhsul itkiyə gedir. Prezident tərəfindən bu məqsədlə 160 milyon manat vəsaitin ayrılması müsbət addımdır. Hesab edirəm ki, sözügedən qərar bu istiqamətdə həyata keçirilən işlərin gedişinə müsbət təsir göstərəcək. Çünki məhsulun itkisiz yığılması texnikanın yetərli səviyyədə olmasına bağlıdır. Ona görə də bu, kənd təsərrüfatındaki texnika çatışmazlığının aradan qaldırılmasına kömək edəcək. Bütün bunlarla bərabər, Azərbaycanda kənd təsərrüfatı texnikasının istehsalına önəm verilməlidir. Hesab edirəm ki, biz bu sahəyə də diqqəti artırmalıyıq. Bu, zamanla xaricdən asılılığı daha da azaldacaq. Fikrimcə, bunun üçün ölkədə müəyyən baza var. Gəncə maşınqayırma zavodunda, Bakıdakı bəzi müəssisələrdə bunun üçün baza var. Bütün bunları kənd təsərrüfatı texnikasının istehsalına yönəltmək olar. O baxımdan hesab edirəm ki, bəzi kənd təsərrüfatı texnikalarını biz özümüz istehsal etməyə başlamalıyıq”.
Vidadi ORDAHALLI
