Rəsul Cahangirli: “Yaxın gələcəkdə ölkə iqtisadiyyatında turizmin çəkisinin daha da artacağı gözlənir”
Bir sıra amillər Azərbaycana gələn turistləri cəlb edir. Bunlardan başlıcası ölkədəki sabitlik, tolerant mühit və qonaqpərvərlikdir. Sözügedən məsələ ilə bağlı mətbuata açıqlama verən Azərbaycan Turizm Assosiasiyası sədrinin müşaviri Müzəffər Ağakərimovun sözlərinə görə, ölkəyə gələn turistlərin sayının artmasına təsir edən əsas amil mövcud sabitlikdir.
M.Ağakərimov bildirib ki, turistlərin özlərinin də dediyi kimi, onları bura gətirən digər bir səbəb isə Azərbaycan xalqının tolerant və qonaqpərvər olmasıdır: “Digər amil ölkədə gözəl turizm infrastrukturunun yaradılmasıdır. Dördüncü amil isə Azərbaycanda yeni turizm növlərinin meydana çıxmasıdır”.
O qeyd edib ki, dövlətin turizmə göstərdiyi dəstək, sadələşdirilmiş viza rejiminin tətbiq olunması ölkəyə çoxlu turist cəlb edir.
Onun fikrincə, turistlər daha çox Abşeron yarımadası və Bakı şəhərini gəzməyə üstünlük verirlər. Bununla yanaşı, o bildirib ki, Azərbaycana gələn turistlər əsasən mədəni istirahət növünü seçirlər: “Onlar tarixi abidələrlə tanış olur, ekskursiyalara gedir, sonra istirahətə üstünlük verirlər”.
Həqiqətən də son illər bu sahənin inkişafına göstərilən diqqət və qayğı nəticəsində Azərbaycanda geniş turizm infrastrukturu yaradılıb. Yeni mehmanxanalar, istirahət guşələri istifadəyə verilib. Ölkəyə turistlərin cəlb olunması üçün mühüm layihələr həyata keçirilib.
Bütün bunların fonunda, ölkədəki sabitlik, tolerant mühit və qonaqpərvərliyin turist axınında rolunu ekspertlər necə dəyərləndirirlər?
Məsələyə münasibət bildirən ekspert Rəsul Cahangirlinin sözlərinə görə, həqiqətən də sadalanan amillər ölkəyə daha çox turist cəlb edir: “Azərbaycan xalqının qonaqpərvərlik və tolerantlıq ənənələri hər zaman ölkəmizə gələn turistlərin diqqətini cəlb edib. Bu səbəbdən ölkəyə gələn turistlərin sayında ilbəil artım müşahidə olunur. Məsələ ondadır ki, turizm məqsədilə Azərbaycana səfər etmək istəyən bütün turistlərin rahat, təhlükəsiz istirahəti üçün zəruri şərait yaradılıb. Ölkədə mövcud sabitlik, tolerant mühit və qonaqpərvərlik turistlərin cəlb olunmasında xüsusi çəkiyə malikdir. Azərbaycan xalqının özünəməxsus qonaqpərvərliyi turistlərdə böyük təəssürat yaradır. Bütün bunlar əlbəttə ki, turist axınına öz təsirini göstərir. Təkcə yeni il bayramı günlərində “Şahdağ” turizm kompleksinə 16 mindən artıq turist gəlib. Hesab edirəm ki, bu böyük göstəricidir. Turizm ölkəyə xarici valyuta axınını sürətləndirir, xidmət şəbəkəsinin genişləndirilməsinə təkan verir. Nəticədə çox sayda yeni iş yeri yaradılır, ölkədə məşğulluğun sahə və istiqamətləri genişlənir. Azərbaycanda turizm sahəsi böyük perspektivlərə malikdir. Turizmin əksər növlərinin inkişafı üçün geniş imkanlar mövcuddur. Belə ki, kənd, müalicə-sağlamlıq, ekoloji, mədəni, sosial, kommersiya, idman və s. sahələrdə böyük potensial var. Son illərdə əldə olunan sürətli sosial-iqtisadi tərəqqi bu sahənin hərtərəfli inkişafına yeni imkanlar açıb. Bütün bunların edilməsində əsas məqsəd turizmin ölkə iqtisadiyyatının ən dayanıqlı, effektiv və rəqabətə davamlı sahəsinə çevrilməsindən ibarətdir. Görünən odur ki, 2017-ci ildə Azərbaycanda turizmin inkişafı sürətlə davam edib. Ölkədə turizm infrastrukturunun müasir standartlara uyğunlaşdırılması, mövcud turizm məhsullarının təkmilləşdirilməsi sahənin perspektiv inkişafına imkan verir. Aparılan islahatların və sahibkarlara göstərilən dəstəyin nəticəsi olaraq yaxın gələcəkdə ölkə iqtisadiyyatında turizmin çəkisinin daha da artacağı gözlənir”.
Vidadi ORDAHALLI
