Azər Allahverənov: “Faktiki olaraq Azərbaycan vasitəsilə yüklər şərqdən qərbə, qərbdən şərqə daşınacaq”
Bakı Beynəlxalq Dəniz Ticarət Limanında istifadəyə verilən Ro-Ro terminalı ildə 60 minə yaxın TIR və ya 1,8 milyon ton yük qəbul etmək imkanına malikdir. Ən müasir texniki tələblərə uyğun tikilən terminalda iki yanalma körpüsü var. Terminal avtomobil-su və su-avtomobil seqmentlərində təkərli texnikanın daşınması üçün nəzərdə tutulur.
Terminalın açılışında iştirak edən Prezident İlham Əliyevə məlumat verilib ki, buradakı sistem suyun səviyyəsinin enib-qalxmasından asılı olmayaraq gəmilərin təhlükəsiz şəkildə körpüyə yanalmasını təmin edir. Terminalda informasiya texnologiyalarından geniş istifadə olunub.
Dövlət başçısı hazırda Bakı Beynəlxalq Dəniz Ticarət Limanı kompleksinin inşaat ərazisində görülən işlərlə tanış olub. Bildirilib ki, layihə çərçivəsində gəmilərdən toplanmış neft tərkibli və məişət sularının təmizlənməsi üçün Xəzər dənizi hövzəsində ilk dəfə ən son texnologiyaya əsaslanan suyun bioloji təmizlənməsi qurğuları tikilib. İndiyədək 11 dəmir yolu xəttindən ibarət vaqonların qəbulu, göndərilməsi və çeşidlənməsi parkı yaradılıb.
Məlumat üçün qeyd edək ki, 2010-cu ildə təməli qoyulan Ələt qəsəbəsindəki BBDTL-nin hazırda inşası davam edən birinci fazasının yükaşırma imkanı illik 15 milyon ton yük, o cümlədən 100 min konteyner təşkil edir. Limanın tikintisi tam başa çatdıqdan sonra isə illik yükdaşımalar 25 milyon tona, konteyner daşınması isə 1 milyona çatdırılacaq.
Yeni liman ötən il istismara verilmiş Bakı-Tiflis-Qars dəmir yolu xətti üçün bilavasitə yükcəmləyici məntəqə funksiyasını yerinə yetirəcək. Beləliklə, şimal, cənub, şərq və qərb istiqamətlərindən dəhlizlər üzrə ölkəyə daxil olan yük axınlarının yeni liman kompleksində cəmlənərək, buradan Bakı-Tiflis-Qars dəmir yolu xətti ilə Avropa istiqamətində və ya gəmilər vasitəsilə şərq istiqamətində nəql olunmasını təmin edəcək.
Bütün bunlar Azərbaycanın logistik imkanlarının artmasında nə kimi rol oynayacaq?
Məsələyə münasibət bildirən nəqliyyat sahəsi üzrə ekspert Azər Allahverənovun sözlərinə görə, bu, Azərbaycanın logistik imkanlarını daha da artıracaq: “Həm logistik rolu artacaq, həm də liman dəhliz funksiyasını yerinə yetirəcək. Faktiki olaraq Azərbaycan vasitəsilə yüklər şərqdən qərbə, qərbdən şərqə daşınacaq. Bu layihə həm iqtisadi, həm də geosiyasi baxımdan böyük əhəmiyyət kəsb edir. Bu layihənin geosiyasi əhəmiyyəti həm də ondan ibarətdir ki, Azərbaycan sözügedən məsələlərdə regionda həlledici gücə çevrilir. Layihə bunu bir daha sübut edir. Daşınan yüklərin həcminə nəzər salsaq görərik ki, burada kifayət qədər böyük həcmdən söhbət gedir. Bu həm də ölkəyə böyük həcmdə kapital axını deməkdir. Sözügedən kapital axını infrastrukturun yaxşılaşdırılmasına, gücləndirilməsinə əlavə təkan verəcək. Eyni zamanda, ölkə iqtisadiyyatının daha da inkişaf etdirilməsinə istiqamətləndirilə bilər. Digər tərəfdən, bu, yeni texnologiyaların tətbiqi baxımından çox sərfəli hesab olunan kapital axınıdır. Düşünürəm ki, bir sıra parametrlər üzrə Azərbaycan bu layihədən dividendlər əldə edəcək. Bir sıra indiqatorlar üzrə bu layihənin əhəmiyyəti ölkə üçün böyükdür. Bütün hallarda, liman Azərbaycan üçün kifayət qədər uğurlu layihədir. Sırf logistik imkanların artırılması baxımından bu layihənin əhəmiyyəti böyükdür. Logistika ilə yanaşı, bunun arxasında çox böyük proqramlar durur. Ölkə iqtisadiyyatının daha da inkişaf etməsinə xidmət edən həmin proqramlar Azərbaycanın siyasi nüfuzunu artırmağa hesablanıb. Ona görə də limanın Azərbaycan üçün əhəmiyyəti böyükdür”.
Vidadi ORDAHALLI
