Vüqar Bayramov: “Bu o deməkdir ki, ölkədə iqtisadi artım təkcə rəsmi deyil, həm də beynəlxalq qurumlar tərəfindən proqnozlaşdırılır və gözlənir”
Dünya Bankı 2018-2020-ci illərdə Azərbaycanda iqtisadi artımın 2,6 faizədək sürətlənməsini proqnozlaşdırır. Bankın saytında dərc olunan yanvar ayının “Global Economic Prospects” icmalına əsasən, 2018-ci ildə Azərbaycanda ÜDM-in artımı 0,9 faiz, 2019-cu ildə 1,5 faiz təşkil edəcək. Qeyd edək ki, bu, bankın oktyabr proqnozlarına uyğundur.
2020-ci ildə isə Azərbaycanda iqtisadi artım 2,6 faiz səviyyəsində proqnozlaşdırılır. İcmalda artımın olacağı qeyd edilib: “2017-ci ildə Azərbaycan iqtisadiyyatında azalma davam edib. Baxmayaraq ki, bu, 2016-cı illə müqayisədə daha az templərlə baş verib. Ötən il resessiya 3,1 faiz təşkil edib. İqtisadiyyatda 2014-2016-cı illərdə dünya bazarlarında neftin qiymətinin azalması nəticələri, bank sektorunda problemlər özünü büruzə verir. Zəif pul-kredit siyasəti, maliyyə bazarının kiçik həcmi əhalinin real gəlirlərinin artımına zərər vuran inflyasiya ilə mübarizədə səmərəliliyi məhdudlaşdırıb. Lakin qeyri-neft sektorunda sərmayələrin artımı əlamətləri qeyd edilir”.
Onu da qeyd edək ki, 2018-ci ildə Azərbaycan hökuməti ÜDM-in artımını 1,5 faiz, 2019-cu ildə 4 faiz, 2020-ci ildə isə 3,7 faiz səviyyəsində proqnozlaşdırır. Bütün hallarda, sözügedən proqnoza ekspertlərin münasibəti necədir?
Məsələyə münasibət bildirən iqtisadçı-ekspert Vüqar Bayramovun sözlərinə görə, 2018-ci ildə iqtisadi artım olacağı ilə bağlı səslənən proqnozlar reallığa uyğundur: “Bu il iqtisadi baxımdan 2017-ci illə müqayisədə daha uğurlu olacaq. Nəzərə alsaq ki, 2018-ci ildə yalnız Azərbaycan höküməti deyil, eyni zamanda beynəlxalq maliyyə qurumları, Beynəlxalq Valyuta Fondu, Dünya İnkişaf Bankı Azərbaycanda iqtisadi artımın olacağını proqnozlaşdırırlar, bu o deməkdir ki, ölkədə iqtisadi artım təkcə rəsmi deyil, həm də beynəlxalq qurumlar tərəfindən proqnozlaşdırılır və gözlənir. Ümumilikdə, 2018-ci ilin iqtisadiyyat üçün uğurlu il olacağı proqnozlaşdırılır. Çünki həm Azərbaycan hökuməti, həm də beynəlxalq qurumlar 2018-ci ildə Azərbaycan iqtisadiyyatının 2 faiz artacağını proqnozlaşdırırlar. Azərbaycan hökuməti təqribən 2 faizə yaxın iqtisadi artım proqnozlaşdırır. Eyni zamanda, beynəlxalq maliyyə qurumları da iqtisadi artım tempinin iki faizə yaxın həddə olacağını proqnozlaşdırırlar. Yəni, nəticə etibarilə, 2018-ci il üçün beynəlxalq maliyyə qurumları ilə Azərbaycan hökumətinin proqnozları, demək olar ki, üst-üstə düşür. Dünya Bankı ilə yanaşı, Beynəlxalq Valyuta Fondu, Avropa Yenidənqurma və İnkişaf Bankı ölkəmizdə iqtisadi artım olacağı qənaətindədirlər və bu, 2018-ci il üçün verilən pozitiv siqnallardır. Bu proqnozlar nikbin proqnozların verilməsinə imkan yaradır. İqtisadi artımın olması bir sıra sektorlarda canlanmaya səbəb olacaq. Bəzi sektorlarda 2018-ci ildə iqtisadi artıma uyğun olaraq artım qeydə alınacağı gözlənir. Xüsusən inşaat və xidmət sektorlarında artım gözlənir. Bundan başqa, 2018-ci il, nəhayət, uzun müddətdən bəri gözlənilən TANAP layihəsinin start götürəcəyi bir il kimi də yadda qala bilər. Çünki 2018-ci ildə TANAP-ın istifadəyə veriləcəyi planlaşdırılır. Bu da növbəti il ölkəyə yeni valyuta axını gətirə bilər. Həmçinin, valyuta həcmlərində artım müşahidə olunacağını deməyə əsas verir. Ümumiyyətlə, TANAP istifadəyə veriləcəyi təqdirdə dövlət gəlirlərinin artımına nail olunacaq. Qeyd edim ki, qarşıdakı il üçün nəzərdə tutulan ən vacib iqtisadi məqamlardan biri də məhz budur”.
Vidadi ORDAHALLI
