Zakir Əhmədov: “Azərbaycana birbaşa uçuşlar təşkil edən ərəb ölkələrinə məxsus aviaşirkətlərin sayı artıb”
Məlum olduğu kimi, Birləşmiş Ərəb Əmirliklərinin “Air Arabia” şirkəti 2018-ci ilin yayından Şarjadan Qəbələyə birbaşa uçuşlar həyata keçirəcək. Bu barədə “Albawada Business”nəşri məlumat verib. İlk reys iyunun 27-də nəzərdə tutulub. Biletin qiyməti hər iki tərəfə 374 avro olacaq. Reyslər həftədə üç dəfə - bazar ertəsi, çərşənbə və cümə günləri olacaq.
Ərəb mənbələrinin məlumatına görə, Qəbələ yumşaq iqlimi və dağ landşaftı ilə seçilir, yayı təbiətdə keçirmək, zəngin mədəni irslə tanış olmaq istəyən səyahətçilər üçün ideal yerdir.
“Air Arabia” qrupunun baş icraçı direktoru Adel Əl Əli deyib ki, Qəbələ populyar yerdir və Fars körfəzi regionundan olanlar üçün çox cəlbedicidir: “Qəbələyə reyslər sərnişinlərin Fars körfəzindən Azərbaycana sərfəli səfərləri ilə bağlı təkliflərin sayını artırır və bizim Qafqaz regionunda şəbəkəmizi möhkəmləndirir”.
Qeyd edək ki, “Air Arabia”, həmçinin, Bakıya gündəlik birbaşa reyslər həyata keçirir.
Son illər Azərbaycanın ərəb ölkələri ilə iqtisadi əlaqələri genişlənir. Bu baxımdan birbaşa təyyarə reysinin açılmasını ekspertlər necə dəyərləndirirlər?
Məsələyə münasibət bildirən ekspert Zakir Əhmədovun sözlərinə görə, bu, ərəb ölkələrindən Qəbələyə daha çox turist axınına səbəb olacaq: “Nəzərə almaq lazımdır ki, Azərbaycanın turizm sahəsi son illər sürətlə inkişaf edir. Ölkəyə gələn turistlərin sayı nəzərəçarpan dərəcədə artıb və bu tendensiya davam edir. Xüsusilə ərəb ölkələrindən olan turistlər üçün Azərbaycan cəlbedicidir. Prezident İlham Əliyevin imzaladığı silsilə fərman və sərəncamlar nəticəsində Körfəz ölkələrindən Azərbaycana gələn turistlər üçün hava limanlarında viza almaq imkanı yaradılıb. Eyni zamanda “Asan Viza” sistemi vasitəsilə üç gün müddətində elektron qaydada vizaların əldə olunması, turizmin müxtəlif növlərinin inkişaf etdirilməsi, turistlərin rahat və təhlükəsiz səfərlərinin təşkil olunması buna yaxşı şərait yaradır. Bütün bunlar daha çox ərəb turistin Azərbaycana üz tutmasına şərait yaradır. Birbaşa təyyarə reysinin açılması turistlərin səfərləri üçün xüsusi imkanlar yaradır. Azərbaycanı turizm ölkəsi kimi cəlbedici edən faktorlar çoxdur. Məsələ ondadır ki, ölkədə iqlimin əlverişliliyi, insanların qonaqpərvərliyi, islam dininə uyğun olaraq qaydalara riayət olunması vacib faktorlardır. Son illər Körfəz ölkələri ilə sıx fəaliyyət nəticəsində Azərbaycana birbaşa uçuşlar təşkil edən ərəb ölkələrinə məxsus aviaşirkətlərin sayı artıb. Bunlara Qəbələnin də əlavə olunması əlbəttə ki, yaxşı haldır. Hesab edirəm ki, bu amillər daha çox ərəb turistin ölkəyə gəlməsinə şərait yaradacaq”.
Vidadi ORDAHALLI
