Azər Əliyev: “Paytaxt ərazisində müxtəlif beynəlxalq əhəmiyyətli tədbirlərin keçirilməsi turistlərin səyahət üçün Bakını seçməsinə səbəb olan faktorlardan biri sayılır”
Azərbaycanda turizm artıq yüksəliş dövrünü yaşayır. Dünyanın hər yerindən çoxlu sayda insan ölkəmizə dincəlmək və ya işlə bağlı, habelə hər il Azərbaycanda keçirilən çoxsaylı beynəlxalq tədbirlərdən birində iştirak etmək üçün gəlir.
Azərbaycanda olan insanlar deyirlər ki, onlar zəngin təbii ehtiyatları, tarixi, mədəniyyəti, ənənələri və son dərəcə qonaqpərvər xalqı olan bu ölkəni dünya turizminin yeni mirvarisi kimi kəşf ediblər. Azərbaycanda olmamış səyahətçilər, turistlər isə Bakıda olmadıqlarına görə peşmançılıq hissi keçirir və mütləq Azərbaycana səyahət edəcəklərini bildirirlır.
Bu yaxınlarda ABŞ-ın məşhur “USA TODAY” informasiya agentliyində dərc olunan məqalədə 2018-ci ildə səyahət edilməli şəhərlər sırasında Azərbaycanın paytaxtı Bakı qeyd olunub. Dünyanın 193 ölkəsinə səyahət edən gənc amerikalı səyyah Sal Lavallonun agentlik üçün hazırladığı reytinqdə Bakı ilk sırada qeyd olunur.
“Neftlə zəngin bu paytaxt şəhəri mədəniyyət və müasir memarlığa milyardlarla vəsait sərf edib. Şəhərdə gəzinti sanki açıq hava muzeyində gəzintiyə bənzəyir” - deyən 27 yaşlı səyyah şəhərdə müasir arxitektura və qədim binaların ahəngini də vurğulayır.
İlk səyahət olunmalı şəhərlər sırasında, həmçinin, Şərqi Timorun paytaxtı Dili, Abu Dabi (Birləşmiş Ərəb Əmirlikləri), Kiqali (Ruanda), Skopye (Makedoniya), Beyrut, Mendoza (Argentina), Fritaun (Syerra-Leon), Asmara (Eritreya), Baqan (Myanmar), Konstantin (Əlcəzair) yer alıb.
Səyahət edilməli şəhərlər arasında paytaxt Bakının da yer alması sevindiricidir.
Turizm sahəsi üzrə ekspert Azər Əliyev bizimlə söhbətində qeyd etdi ki, xarici turistlərin Bakıya səyahət etməsinin müxtəlif səbəbləri var: “Səbəblərdən biri əlverişli iqlimdir. Erkən bahar, mülayim qış və bol-bol günəş Azərbaycanı çimərlik turizmi mərkəzinə çevirib. Abşeron sahillərində çimərlik mövsümü may ayında açılır və sentyabrın sonunadək davam edir. Bu hal turistlərin Bakını seçməsinə səbəb olur. Digər səbəb isə Bakıda olan tarixi abidələrdir. UNESCO-nun Dünya İrsi siyahısına salınan İçərişəhərə maraq göstərən turistlərin sayı yetərincədir. Qız Qalası, Şirvanşahlar Sarayı, o cümlədən məscidlər, minarələr, karvansara və hamamlara səyahət edən turistlərin sayı günü-gündən artır.
Onu da bildirim ki, Azərbaycan qədim zamanlardan bəri odlar diyarı kimi tanınıb. Bu əbəs yerə olmayıb, çünki Abşeron yarımadası neft və qazla zəngindir. Yanan qazların yerin səthinə çıxması ilahi möcüzə hesab olunub və dünyanın hər yerindən adamlar cəlb edib. Qədim zamanlardan atəşpərəstlər Bakıya gəlib və müqəddəs od üzərində öz məbədlərini inşa ediblər. Onlardan biri zərdüştlərin od məbədi Atəşgahdır. Bu məbədi görmək üçün Bakıya istənilən fəsildə turistlər gəlir”.
Həmsöhbətimiz onu da bildirdi ki, xarici turistlərin Bakını seçməsi səbəblərindən biri də Dənizkənarı Parkda insanların istirahəti üçün yaradılan şəraitdir: “Həmçinin, paytaxt ərazisində müxtəlif beynəlxalq əhəmiyyətli tədbirlərin keçirilməsi turistlərin səyahət üçün Bakını seçməsinə səbəb olan faktorlardan biri sayılır”.
Günel CƏLİLOVA
