Aydın Hüseynov: “Bu baxımdan aparılan siyasət, görülən işlər təqdirəlayiqdir”
Prezident İlham Əliyevin ötən il 28 şəhər və rayona etdiyi 31 səfərdən sonra abadlıq-quruculuq işlərinin davam etdirilməsi, yol infrastrukturunun yenilənməsi ilə bağlı imzaladığı 36 sərəncama əsasən, 155,29 milyon manat vəsait ayrılıb.
Avqust ayı Prezidentin regionlara səfərləri çərçivəsində iş qrafikinin zənginliyi ilə yadda qalıb. Belə ki, ayın əvvəlində şimal-qərb bölgəsində səfərdə olan Prezident avqustun 19-20-də qərb bölgəsinə – Göygöl, Samux, Gədəbəy və Şəmkir rayonlarına səfər edib.
Dövlət başçısının avqust ayında səfər etdiyi 7 rayonun sosial-iqtisadi inkişafı ilə bağlı imzaladığı 10 sərəncama əsasən, ümumilikdə 35,89 milyon manat vəsait ayrılıb.
Bütövlükdə, bu gün regionların inkişafı ölkədə uğurla həyata keçirilən davamlı sosial-iqtisadi inkişaf strategiyasının mühüm tərkib hissəsidir. Regionların inkişafı sahəsində qəbul edilən dövlət proqramlarında, habelə regionların sosial-iqtisadi inkişafına dair əlavə tədbirlərlə bağlı sərəncamlarda nəzərdə tutulmuş vəzifələrin icrası ölkədə qeyri-neft sektorunun davamlı inkişafına xidmət edir. Həmçinin bu, regionlarda kommunal xidmətlərin və sosial infrastruktur təminatının keyfiyyətinin yüksəldilməsinə təkan verib.
Bu bir daha göstərir ki, regionların sosial-iqtisadi inkişafı dövlətin iqtisadi siyasətinin prioritet istiqamətlərindən biri kimi xüsusi diqqət mərkəzində saxlanır. Ölkə başçısı bu məqsədlə ölkənin şəhər və rayonlarına müntəzəm səfərlər edir, görülən işlərlə şəxsən maraqlanır.
Ümumən bu istiqamətdə ayrılan vəsaitin həcmini, görülən işləri ekspertlər necə dəyərləndirirlər?
Məsələyə münasibət bildirən millət vəkili Aydın Hüseynovun sözlərinə görə, bu istiqamətdə bir sıra işlər görülüb: “Bütövlükdə götürdükdə cənab İlham Əliyevin strategiyasının əsasında xalqa xidmət dayanır. Bununla bağlı bir sıra dövlət proqramları qəbul olunub. Sözügedən dövlət proqramlarının birbaşa müəllifi cənab Prezidentdir. Prezidentin dövlət proqramlarının başlıca məqsədində göstərilirdi ki, regionların tarazlı inkişafı, regionlarda potensialdan səmərəli istifadə etmək prioritetdir. Artıq doğrudan da biz bu gün görürük ki, regionlar çox yüksək səviyyədə inkişaf edir və bu özünü bir sıra sahələrdə göstərir. Regionların inkişaf etməsi, orada aparılan bir sıra abadlıq-quruculuq işləri ölkə Prezidentinin yeritdiyi siyasətin tərkib hissəsidir. Sözügedən məsələlərlə bağlı cənab Prezident daim regionlara səfərlər edir. Orada yeni obyektlərin təməlqoyma, açılış mərasimlərində iştirak edir. Bu o deməkdir ki, regionlarda açılan hər bir müəssisənin, obyektin, layihənin gedişi ilə bağlı Prezident maraqlanır, daim həmin məsələləri diqqət mərkəzində saxlayır. Eyni zamanda, bütün infrastrukturun yenilənməsi baxımından bunun əhəmiyyəti böyükdür və daim bu məsələyə diqqət göstərilir. Bütün bunların nəticəsidir ki, regionlarda kənd təsərrüfatı, turizm, sənaye sektoru sürətlə inkişaf edir. Regionlar, faktiki olaraq, çox böyük inkişaf mərhələsinə qədəm qoyub. Bütün bunlar regionların inkişafına göstərilən qayğının nəticəsidir. Proseslərin gedişi onu göstərir ki, bir neçə ildən sonra regionlar ölkə iqtisadiyyatında daha böyük çəkiyə malik olacaqlar. Çünki bölgələrin sosial-iqtisadi inkişafı hər keçən gün daha da böyüyür. Bu da ölkənin ümumi inkişafına öz töhfəsini verir. Bu baxımdan aparılan siyasət, görülən işlər təqdirəlayiqdir”.
Vidadi ORDAHALLI
