“Mühərriki kiçik olan avtomobillərin qiymətlərində bir dəyişiklik gözlənilmir”
Vüqar Bayramov: “Əvvəlki dövrlərdə gətirilmiş avtomobillərin qiymətlərində də artım olur”
Məlum olduğu kimi, yanvarın 1-dən Azərbaycana idxal edilən minik avtomobillərinə tətbiq edilən idxal gömrük rüsumu artıb. Belə ki, bu, Nazirlər Kabinetinin 17 noyabr 2017-ci il tarixli qərarı ilə təsdiq edilən “Azərbaycan Respublikasının xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələri”ndə əksini tapıb.
İndiyə qədər qüvvədə olan “Azərbaycan Respublikasında ixrac-idxal əməliyyatları üzrə gömrük rüsumlarının dərəcələri haqqında” qərara əsasən, mühərrikinin silindrlərinin işlək hissəsinin həcmi 1500 kubsantimetrdən çox, lakin 1800 kubsantimetrdən çox olmayan təzə minik avtomobilləri üçün idxal gömrük rüsumu mühərrikin həcminin hər 1 kubsantimetri üçün 0,40 dollar, istismar olunmuş belə avtomobillərin mühərrikinin həcminin hər 1 kubsantimetri üçün 0,70 dollar olub.
Yeni qərara əsasən, 1 yanvar 2018-ci ildən mühərrikinin silindrlərinin işlək hissəsinin həcmi 1500 kubsantimetrdən çox, lakin 1800 kubsantimetrdən çox olmayan, mühərrikinin silindrlərinin işçi həcmi 1800 kubsantimetrdən çox, lakin 3000 kubsantimetrdən çox olmayan və mühərrikinin silindrlərinin işçi həcmi 3000 kubsantimetrdən çox olan təzə və istismar olunmuş minik avtomobilləri üçün idxal gömrük rüsumu artırılıb. Bu kateqoriyalardan olan təzə minik avtomobilləri üçün idxal gömrük rüsumu mühərrikin həcminin hər 1 kubsantimetri üçün 0,70 dollar, istismar olunmuş belə avtomobillərin mühərrikinin həcminin hər 1 kubsantimetri üçün 1,2 dollar olacaq.
Minik avtomobillərinə tətbiq edilən idxal gömrük rüsumunun artmasının bazardakı qiymətlərə təsir edəcəyi güman olunur. Çünki Azərbaycan avtomobil istehsalçısı deyil, avtomobil bazarında idxalçı ölkədir. Ona görə də bu, avtomobil bazarına ciddi şəkildə təsir edə bilər.
Maraqlıdır, bəs ekspertlər buna necə yanaşırlar? Məsələyə münasibət bildirən iqtisadçı-ekspert Vüqar Bayramovun fikrincə, gömrük rüsumlarının artırılması yalnız irihəcmli avtomobillərə təsir göstərəcək: “Təbii ki, qiymətləndirmələrə görə, bu, avtomobil bazarına təsir göstərəcək. Mühərriki kiçik olan avtomobillərin qiymətlərində bir dəyişiklik gözlənilmir. Onların rüsumları dəyişməyəcək. Lakin mühərriki böyük olan avtomobillərin qiymətində artımlar qaçılmazdır. Bu, eyni zamanda, “Avro 4” və “Avro 5” standartlarına uyğun istehsal edilən, əvvəlki illərdə ölkəyə gətirilən avtomobillərin də qiymətinə təsir göstərəcək. Çünki avtomobil bazarının özəlliyi ondan ibarətdir ki, avtomobillərin ilinə və markasına, vəziyyətinə uyğun olaraq qiymət müəyyənləşib. Burada artıq qiymətlərdə həmin avtomobilin nə zaman ölkəyə idxal edilməsi praktik olaraq əsas faktor olmur. Misal üçün, 2016-cı ildə istehsal olunan avtomobil həmin il ölkəyə nisbətən az rüsumla gətirilibsə, artıq 2018-ci ilin rüsumları yanvarın 1-dən etibarən yüksəlir. Yəni əvvəlki dövrlərdə gətirilmiş avtomobillərin qiymətində də artım olur. Ona görə də əvvəlki illərdə gətirilmiş, hazırda istismar edilən avtomobillərin qiymətlərində artımların olacağı gözlənilən idi. Yanvar ayı gəlməmiş, artıq avtomobil bazarında qiymət artmağa başladı. Bir sıra irimühərrikli avtomobillərin qiymətlərində artımlar var”.
Vidadi ORDAHALLI
