Əkrəm Həsənov: “100 min ailənin təxminən 60 mini çətin vəziyyətdə yaşayır və bu insanların kredit borcu banklar tərəfindən silinməlidir”
Statistik məlumatlara əsasən, 2000 dollar məbləğində borcla bağlı banklarla fikir ayrılığı olan müştərilərin sayı 100 min nəfərdən çoxdur.
Bunu bank ombudsmanının məsul katibi Elçin Həsənov bildirib: “Bank ombudsmanı İkram Kərimov hər zaman qeyd edib ki, iddia məbləğinin 2000 dollar müəyyən edilməsində əsas məqsəd aztəminatlı ailələrin öhdəliklərinin yerinə yetirilməsi ilə əlaqədar qarşılaşdıqları problemlərin aradan qaldırılması və problemli kreditlərin böyük hissəsinin məhz bu məbləğdən aşağı olmasıdır. Məbləğ artırıldığı təqdirdə bu rəqəmin sayı daha da yüksələcək. Ona görə ilkin mərhələdə götürülən məbləğ daha realdır. Gələcək görülən işlərin nəticəsindən və eləcə də qazanılan təcrübələrdən asılı olaraq, bu məbləğin daha da artırılması nəzərdə tutula bilər”.
100 mindən çox insanın 2000 dollara yaxın məbləğdə krediti var. Bu şəxslərin əksəriyyətinin kredit qaytarmaq və ya qarşılaşdıqları problemlə bağlı müəyyən çətinlikləri mövcuddur. Kimin 1000, bəzisinin 1500 və ya 2000 dollar kredit borcuna görə bankla arasında problem yaşanır.
Maraqlıdır, 100 minə yaxın insanın 2000 dollara yaxın kredit problemini necə həll etmək olar?
Bank sahəsi üzrə mütəxəssis Əkrəm Həsənov “Bakı-Xəbər”ə açıqlamasında qeyd etdi ki, xeyli sayda insanın banka cüzi məbləğdə borcu var: “Elə şəxslər var ki, onların aylıq gəliri və əmlakı yoxdur. Yaxud işləyir, ancaq onun gəliri həmin ailənin yaşayış minumumunu təmin etmir. Belə olan halda, bank ombudsmanına ehtiyac yoxdur. Banklar sosial durumu çətin olan ailələrin kredit borcunu silməlidirlər. Hesab edirəm ki, 100 min ailənin təxminən 60 mini çətin vəziyyətdə yaşayır”.
Aylıq gəliri normal olan ailələrə gəlincə, ekspert bildirdi ki, əksər vətəndaşın krediti dollarladır: “Belə olan halda, kredit milli valyutaya çevrilməli və orta məzənnə müəyyən olunmalıdır. Eyni zamanda, vətəndaşa vaxt verilməlidir ki, həmin müddətə qədər güzəştli krediti qaytara bilsin. Əksər şəxslər kredit borcunun ödənilməsindən yayınmaq istəmirlər. Sadəcə onlar güzəştin tətbiq olunmasını arzu edirlər. 2000 dollara qədər krediti olan şəxslərə güzəşt tətbiq olunarsa, bu həm banklara, həm də vətəndaşlara sərf edər”.
Günel CƏLİLOVA
