Vüqar Bayramov: “İnkişaf etmiş əksər ölkələrdə bu tip qurumlar var”
Məlum olduğu kimi, Prezident İlham Əliyev kiçik və orta sahibkarlıq sahəsində idarəetmənin daha da təkmilləşdirilməsi haqqında Fərman imzalayıb. Fərmana əsasən, İqtisadiyyat Nazirliyinin tabeliyində publik hüquqi şəxs statuslu “Azərbaycan Respublikasının Kiçik və Orta Sahibkarlığın İnkişafı Agentliyi” yaradılıb.
Sözügedən agentlik ölkədə kiçik və orta sahibkarlığın (KOS) inkişafını dəstəkləyən, KOS subyektlərinə bir sıra xidmətlər göstərən, dövlət orqanlarının bu sahədə xidmətlərinin əlaqələndirilməsini və tənzimlənməsini həyata keçirən publik hüquqi şəxsdir.
Agentliyin tərkibində ölkənin iri rayon və şəhərlərində kiçik və orta sahibkarlara bir sıra xidmətləri (təlim, məsləhət, informasiya, biznes-inkubator, innovasiya mərkəzi, maliyyə xidmətləri və s.) bir məkanda təklif edən “Kiçik və orta sahibkarlıq evi” yaradılacaq və onların fəaliyyəti “ASAN xidmət” mərkəzləri, “ASAN xidmət” mərkəzləri olmayan regionlarda isə Azərbaycan Respublikası İqtisadiyyat Nazirliyinin regional bölmələri vasitəsilə həyata keçiriləcək.
Qurumda agentliyin fəaliyyətinə rəhbərliyi həyata keçirən və ictimai əsaslarla fəaliyyət göstərən 7 nəfərdən ibarət Müşahidə Şurası yaradılacaq.
Görünən odur ki, agentlik kiçik və orta sahibkarlıq sahəsində idarəetmənin daha da təkmilləşdirilməsi məqsədilə ölkədə kiçik və orta sahibkarlığın inkişafını dəstəkləyəcək, KOS subyektlərinə bir sıra xidmətlər göstərəcək, dövlət orqanlarının bu sahədə xidmətlərini əlaqələndirəcək və tənzimlənməni həyata keçirəcək.
Maraqlıdır, bəs ekspertlər bunun əhəmiyyətini necə dəyərləndirirlər, bundan gözləntiləri nədir?
Məsələyə münasibət bildirən iqtisadçı-ekspert Vüqar Bayramovun sözlərinə görə, bunun bir sıra əhəmiyyəti var: “Əvvəla belə bir agentliyin yaradılması “Strateji Yol Xəritəsi”nə uyğun olaraq həyata keçirilir. Çünki “Strateji Yol Xəritəsi”ndə kiçik və orta sahibkarlığın dəstəklənməsi, institusional qurumların yaradılması əsas hədəflərdən biridir. Agentliyin yaradılması imkan verəcək ki, kiçik və orta sahibkarlığın inkişafı ilə bağlı investisiya mühütini daha da yaxşılaşdırmaq mümkün olsun. Yəni bu, investisiya mühitinin yaxşılaşdırılması baxımından çox vacibdir. Eyni zamanda, kiçik və orta sahibkarların üzləşdiyi problemlərin həlli baxımından belə bir qurumun yaradılmasına ehtiyac var idi. Çünki bu agentlik həm də kiçik və orta müəssisələrin maliyyə resurslarının genişləndirilməsinə imkan verəcək. Bununla yanaşı, bazarlara çıxış imkanlarının artırılmasına şərait yaradacaq. Nəticədə bu agentliyin yaradılması kiçik və orta sahibkarlığın institusional olaraq dəstəklənməsinə imkan verəcək. Maliyyə resurslarından və eləcə də kreditlərdən daha yaxından, səmərəli faydalanmasına şərait yaradacaq. Ona görə də belə bir qurumun yaradılmasına həqiqətən böyük ehtiyac var idi. Çünki inkişaf etmiş əksər ölkələrdə bu tip qurumlar var. Kiçik və orta sahibkarlığın inkişafı ayrıca qurum tərəfindən dəstəklənir. O baxımdan güman olunur ki, yeni yaradılan qurum sahibkarların bu gün üzləşdiyi bir sıra problemlərin aradan qaldırılması, xüsusən də maliyyə resurslarına çıxış imkanlarının genişləndirilməsi, bazarlara sərbəst daxil olmanın asanlaşması baxımından ciddi əhəmiyyətə malik olacaq. Nəzərə almaq lazımdır ki, ölkədə ciddi iqtisadi inkişafı genişləndirmək üçün kiçik və orta sahiblkarlara maksimum əlverişli şərait yaratmaq lazımdır. Belə olarsa, o zaman ölkənin bütün ərazilərində kompleks inkişaf özünü göstərəcək. Nəinki paytaxtda və böyük şəhərlərdə, həmçinin, regionlarda kiçik və orta sahibkarlığın iqtisadiyyatda rolu artacaq”.
Vidadi ORDAHALLI
