Vüqar Bayramov: “...ölkəyə daxil olan valyutanın həcmi baxımından arzuolunan bir rəqəmdir”
“Bu ilin ötən müddəti ərzində ölkənin ticarət saldosu müsbətə doğru dəyişib. Şübhəsiz ki, burada neftin qiymətinin artmasının da rolu var. Eyni zamanda, ölkədə aparılan idxalın əvəzlənməsi siyasəti öz müsbət nəticələrini verməkdədir. İndi ticarət saldomuz təqridən 5 milyard dollara yaxın müsbət nəticə verib. Bu da onu göstərir ki, ölkəyə daha çox xarici valyuta daxil olur. Belə vəziyyət bizim tədiyyə balansımıza müsbət təsir göstərir. Beləliklə, biz valyuta ehtiyatlarımızı, maliyyə qüvvəmizi bir qədər də artırmağa nail olmuşuq”.
Bunu maliyyə naziri Samir Şərifov AZTV-də efirə gedən “Günün nəbzi” verilişində bildirib. O qeyd edib ki, 2018-ci ildə də bu işlərin davam etdirilməsi istiqamətində addımlar atılacaq.
Xarici ticarətdə müsbət saldonun 5 milyarda çatmasının nəyin hesabına olduğunu öyrənmək üçün iqtisadçı-ekspert Vüqar Bayramova müraciət etdik. V.Bayramov “Bakı-Xəbər”ə açıqlamasında qeyd etdi ki, xarici ticarətdə müsbət saldonun 5 milyarda çatması Azərbaycan ixracatının artması ilə bağlıdır. Eyni zamanda, idxalın azalması xarici ticarətə təsir göstərir: “Azərbaycan ixracatının artması neftin dünya bazarında proqnozlaşdırılan qiymətdən yüksək satılmasıdır. Nəticə etibarilə Azərbaycanın neft satışından əldə etdiyi gəlirlərə təsir göstərir”.
Həmsöhbətimiz onu da vurğuladı ki, qeyri-neft sektorunda qeydə alınan inkişaf bu sahəyə öz təsirini göstərir: “Azərbaycanın qeyri-neft ixracatı təxminən 1,5 milyard dollara çatır. Bu da əvvəlki illə müqayisədə təxminən 20 faiz çoxdur. Qeyri-neft ixracatının artması Azərbaycan ixracatının artmasına səbəb olur. İdxalın azalması prosesi davam edir. İdxalın yerli istehsalla əvəz olunması bu sahənin inkişafına təsir göstərir”.
İqtisadçının sözlərinə görə, Prezident İlham Əliyevin imzaladığı sənədlər ümumi idxalın səviyyəsinə təsir göstərir: “İxracın artması fonunda idxalın azalmasını müşahidə etdik. Bu da ticarət dövriyyəsində müsbət saldonun artmasına səbəb oldu. Azərbaycanın xarici ticarət dövriyyəsində 5 milyarda yaxın müsbət saldonun yaranması ölkəyə daxil olan valyutanın həcmi baxımından arzuolunan bir rəqəmdir”.
Günel CƏLİLOVA
