Fikrət Yusifov: “Gələn il ölkə iqtisadiyyatının qeyri-neft sektoru daha sürətlə inkişaf edəcək”
2017-ci il Azərbaycan iqtisadiyyatı üçün uğurlu bir il olub, cari il sabitləşmə ili kimi yadda qalacaq. Bunu maliyyə naziri Samir Şərifov deyib.
Onun sözlərinə görə, bu il Azərbaycanda 2015-2016-cı illərdə xarici şoklara məruz qaldığı zaman yaranan problemlərin həlli ilə məşğul olunub, ölkə iqtisadiyyatının, makroiqtisadiyyatın sabitləşdirilməsinə səylər göstərilib: “Artıq məmnunluqla qeyd etmək olar ki, Prezident İlham Əliyev tərəfindən aparılan məqsədyönlü tədbirlər öz nəticələrini verib. Belə ki, artıq 11 ayın yekunlarına görə, iqtisadiyyatda sabitləşmə baş verib. Əvvəlki illə müqayisədə ölkənin iqtisadi vəziyyəti daha sabitdir. Yəni makroiqtisadi sabitlik bərqərar olunub”.
Samir Şərifov bildirib ki, 2017-ci ildə iqtisadiyyatda yaranmış geriləmənin aradan qaldırılması istiqamətində görülən işlər 2018-ci ildə də davam etdiriləcək: “Qəbul edilmiş dövlət büdcəsi bunun üçün münbit şərait yaradır. İlk növbədə ona görə ki, artıq İqtisadiyyat Nazirliyi tərəfindən hazırlanmış makroiqtisadi proqnoza görə, ölkə iqtisadiyyatının növbəti ildə 1,5 faiz artacağı gözlənir. Artımın əksər hissəsi qeyri-neft sektorunun payına düşəcək. Bu vacib bir göstəricidir. Çünki cari ildə də qeyri-neft sektoru 22,4 faiz artıb, lakin neft sektorunda bizdə bir qədər geriləmə var”.
Nazir bildirib ki, ÜDM-də qeyri-neft sektorunun payı 70 faizə yaxınlaşmaq üzrədir və bu proses davam edəcək.
Maraqlıdır, bəs ekspertlərin buna münasibəti necədir? 1,5 faiz iqtisadi artım nəyin hesabına olacaq?
Sözügedən məsələni “Bakı-Xəbər”ə şərh edən “Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifov bunu bir sıra arqumentlərlə əsaslandırdı. Onun fikrincə, cari ilin son on bir ayının yekunları 2017-ci ilin ölkə iqtisadiyyatında əsaslı dönüş ili kimi tarixə düşəcəyindən xəbər verir: “Azərbaycan yenə də iqtisadi inkişaf tempinə görə liderlik etmək iddiasındadır. Lakin indi bunu neftdən, qazdan asılı olmayan bir iqtisadiyyatın – real sektorun hesabına etməyi hədəfləyir. Ötən 11 ayının yekunları dediklərimizi tam əsaslandırmağa imkan verir. Dövlət Statistika Komitəsinin rəsmi məlumatları göstərir ki, cari ilin on bir ayının yekunları kifayət qədər pozitivdir. On bir ay ərzində keçən ilin 11 ayı ilə müqayisədə ümumdaxili məhsulun 0,2 faiz azalması qeydə alınıb ki, bu da ilk növbədə neft hasilatının azalması ilə bağlıdır. Unutmayaq ki, 2016-cı ilin 11 ayı ərzində ÜDM 2015-ci ilin 10 ayı ilə müqayisədə 3,9 faiz azalmışdı. 2016-cı ilin 11 ayı ilə müqayisədə cari ilin 11 ayı ərzindəki ümumi iqtisadi durum bütövlükdə pozitivdir və cari ilin ötən dövrü ərzində 2016-cı ildə baş vermiş iqtisadi geriləmələr praktik olaraq aradan qaldırıla bilmişdi. Keçən illə müqayisədə cari ilin 11 ayı ərzində bütün göstəricilər üzrə əsaslı irəliləyişlər baş verib. Bu on bir ayda göstəricilərin bu qədər pozitiv olması o deməkdir ki, biz cari ili müsbət saldo ilə yekunlaşdırmaq ərəfəsindəyik. Buna görə də 2017-ci ilin tənəzzüldən sonra iqtisadi artımların başlanğıcının qoyulduğu il kimi tarixə düşəcəyi şübhəsizdir. Bu gün artıq Azərbaycan iqtisadiyyatının real sektorunda bütün istiqamətlərdə uğurlu nəticələr əldə edilir. Bu sektorun aparıcı sahəsi olan aqrar bölmənin göstəriciləri kifayət qədər cəlbedicidir. Əgər 2015-ci ildə Azərbaycanda cəmi 200 kiloqramdan bir qədər çox barama istehsal olunmuşdusa, 2016-cı ildə bu rəqəm 70 tona çatıb və yaxın bir neçə ildə onun on dəfələrlə artırılması nəzərdə tutulur. Bu il artıq 244 ton yaş barama tədarük edilib. Ötən il 51 min hektar sahədə, cari ildə isə 136 min hektar sahədə pambıq əkilib. Yola saldığımız ilin dekabr ayının 25-dək ölkə üzrə 205 min 696 ton pambıq tədarük olunub. Nəzərə alaq ki, 2015-ci ildə 18 min hektar sahədən cəmi 35 min ton pambıq yığılmışdı. Yaradılan əlverişli biznes mühiti yerli sahibkarlarla yanaşı, xarici investorları da ölkəmizə cəlb edir. Bunun nəticəsidir ki, Azərbaycana sərmayə qoyan şirkətlərin sayı ilə yanaşı, onların coğrafiyası da getdikcə genişlənir. Hər bir investor ancaq ictimai-siyasi sabitliyin mövcud olduğu ölkəyə sərmayə qoymaqda maraqlı ola bilər. Məhz bu ictimai-siyasi sabitliyin nəticəsidir ki, ölkə iqtisadiyyatına 2004-2017-ci illərdə 225 milyard dollar həcmində investisiya qoyulub. Son 14 ildə ölkə iqtisadiyyatına yatırılan xarici investisiyanın həcmi isə 107,2 milyard dollar təşkil edir. Yola saldığımız ildə ölkə iqtisadiyyatında əldə olunmuş nəticələr gələn ilin iqtisadi artım ili olacağına əsas yaradır. Gələn il ölkə iqtisadiyyatının qeyri-neft sektoru daha sürətlə inkişaf edəcək”.
Vidadi ORDAHALLI
