Zakir Əhmədov: “O baxımdan bu istiqamətdə aparılan işlərə, görülən tədbirlərə müsbət yanaşıram”
Məlum olduğu kimi, Prezident İlham Əliyev “Azərbaycanda 2018-ci il üçün ehtiyac meyarının həddi haqqında” Qanunu təsdiq edib. Qanuna əsasən, ünvanlı dövlət sosial yardımının təyin edilməsi məqsədilə 2018-ci il üçün ehtiyac meyarının həddi 130 manat məbləğində təsdiq edilir. Qanun 2018-ci il yanvarın 1-dən qüvvəyə minir. Qeyd edək ki, 2017-ci ildə ehtiyac meyarı 116 manat təşkil edir.
Prezident həm də 2018-ci il üçün yaşayış minimumu haqqında da qanunu imzalayıb. 2018-ci il üçün yaşayış minimumu ölkə üzrə 173 manat, əmək qabiliyyətli əhali üçün 183 manat, pensiyaçılar üçün 144 manat, uşaqlar üçün 154 manat məbləğində müəyyən edilib. 2017-ci il üçün yaşayış minimumu ölkə üzrə 155 manat, əmək qabiliyyətli əhali üçün 164,5 manat, pensiyaçılar üçün 130,2 manat, uşaqlar üçün 136,6 manat məbləğində müəyyən edilmişdi.
Xatırladaq ki, “Minimum aylıq əməkhaqqının artırılması haqqında” Azərbaycan Respublikası Prezidentinin Sərəncamı ilə minimum aylıq əməkhaqqının məbləği 2018-ci il yanvarın 1-dən 130 manat müəyyən edilib.
Gün ərzində orta hesabla ən azı 150 qram, ildə təxminən 60-65 kq ət və ət məhsullarının istehlak edilməsi fizioloji qida norması hesab edilir. Orqanizmin maddələr mübadiləsi üçün ən zəruri elementlər ət xörəklərinin tərkibində olur. Ona görə də daha tez və asan mənimsənilərək, hüceyrələrdə enerji mənbəyinə çevrilir. Ətlə bərabər, çörək və un məmulatları, meyvə-tərəvəz, yumurta, ağartı məhsulları - qatıq, süd, pendir, kəsmik və s. də əsas qida rasionunun tərkib hissəsidir.
Nazirlər Kabinetinin qərarı ilə təsdiq edilmiş minimum istehlak səbəti üzrə əsas növ ərzaq məhsullarının illik istehlak normalarına görə, orta hesabla bütün əhalinin hər nəfəri üçün çörək və çörək məhsulları 126,2 kq; kartof 50,7 kq, tərəvəz və bostan məhsulları 97 kq; meyvə və giləmeyvə 46 kq; ət və ət məhsulları 31,5 kq; süd və süd məhsulları 231,3 kq; balıq və balıq məhsulları 7,7 kq; yumurta 153 kq, şəkər və qənd məhsulları 17,4 kq; bitki yağları, marqarin və digər piylər 9,8 kq; kərə yağı 6,7 kq təşkil edir.
Ümumilikdə, Azərbaycanda növbəti il üçün ehtiyac meyarının artırılmasını ekspertlər necə dəyərləndirirlər?
Məsələyə münasibət bildirən ekspert Zakir Əhmədovun sözlərinə görə, bunun sayəsində daha çox ölkə vətəındaşı sosial yardım alacaq: “Ən başlıcası isə, bunun sayəsində sosial yardımın həcmi də artacaq. Ona görə ki, əvvəl ehtiyac meyarı 116 manat idisə, qərardan sonra bu, 130 manat olacaq. Ölkə Prezidenti tərəfindən atılan bu addım olduqca sosialyönümlü, humanist addımdır. Çünki bunun sayəsində həm də 145 min vətəndaşın əməkhaqlarında artımlar müşahidə olunacaq. Bunlar birbaşa minimum əməkhaqqı alan vətəndaşlarımızdır. Eyni zamanda, nəzərə almalıyıq ki, bu kimi addımlar birbaşa olaraq aztəminatlı ailələrin sosial vəziyyətinə müsbət təsir göstərir. Ehtiyac meyarının artırılması digər ödənişlərə də təsir göstərəcək. Çünki bir sıra ödənişlər var ki, onların məbləği birbaşa ehtiyac meyarının məbləği ilə müəyyənləşir. Eləcə də özəl və dövlət sektorlarında əməkhaqlarının rəsmiləşdirilməsi sözügedən rəqəmdən aşağı olmayacaq. Minimum əməkhaqqı ilə yanaşı, eyni zamanda, yanvar ayında pensiya məbləğinin orta aylıq əməkhaqqıdakı artım faizinə uyğun indeksasiyası həyata keçiriləcək. Ehtiyac meyarının artırılması aztəminatlı ailələrin sosial durumunu yaxşılaşdıracaq. Bu da, öz növbəsində, onların bir sıra sosial problemlərinin həll olunmasına kömək göstərəcək. Müşahidələr və ilkin reaksiyalar göstərir ki, əhali məlum addımın atılmasına müsbət rakursdan yanaşır. Qarşıdakı dövrlərdə digər sahələrdə də artımların olacağını nəzərə alsaq, hesab edirəm ki, bu, ölkədə aparılan sosial siyasətin uğurlu nəticəsidir. O baxımdan bu istiqamətdə aparılan işlərə, görülən tədbirlərə müsbət yanaşıram”.
Ekspertlər Prezidentin məlum sərəncamından sonra ünvanlı sosial yardımların həm məbləğinin, həm də yardım alan ailələrin sayca çoxalacağını bildirdilər.
Vidadi ORDAHALLI
