Qulu İsmayılov: “Dövlət rəsmiləri arasında əldə olunan bu razılaşmanın bizim kənd təsərrüfatı sektorunun inkişafına ciddi təsiri olacaq”
Prezident İlham Əliyev Rusiya Federasiyasının iqtisadi inkişaf naziri Maksim Oreşkinin başçılıq etdiyi nümayəndə heyətini qəbul edib. Rusiya Federasiyasının iqtisadi inkişaf naziri Maksim Oreşkin Azərbaycandan Rusiyaya kənd təsərrüfatı məhsullarının ixracının 60 faiz artdığını məmnunluqla qeyd edib.
Hələ sovetlər vaxtından Rusiya istehlakçılarının Azərbaycandan keyfiyyətli kənd təsərrüfatı məhsulları aldığını deyən M.Oreşkin bu artımın rusiyalılar tərəfindən yaxşı xəbər kimi qəbul edildiyini vurğulayıb. O, Rusiya tərəfinin Azərbaycanın kənd təsərrüfatı məhsulları istehsal edən daha 14 müəssisəsinin Rusiya bazarlarına çıxması barədə qərar qəbul etdiyini bildirib. Prezident İlham Əliyev bununla bağlı minnətdarlığını ifadə edib. Görüşdə “Şimal-Cənub” nəqliyyat dəhlizinin hər iki ölkə üçün əhəmiyyəti vurğulanıb, ölkələrimizin ticarət əlaqələrində dinamik artımın olduğu qeyd edilib, qarşılıqlı investisiya, turizm, tranzit daşımaları sahəsində əməkdaşlıq imkanları müzakirə olunub.
Azərbaycanın kənd təsərrüfatı məhsulları istehsal edən daha 14 müəssisəsinin Rusiya bazarlarına çıxması barədə əldə olunan razılaşmanın nə kimi əhəmiyyəti var?
Ekspert Qulu İsmayılovun sözlərinə görə, bunun hər iki ölkə üçün faydası olacaq: “Bilirsiniz ki, Azərbaycan uzun illərdir Rusiya bazarını kənd təsərrüfatı malları ilə təmin edir. Oranın daxili bazarında Azərbaycan mallarına böyük tələbat var. Ölkənin hüdudları genişdir, daxili bazarın bizdən ixrac olunan malları qəbul etməyə imkanı böyükdür. Azərbaycan da istehsal etdiyi malların daha yaxın və əlverişli bazarda satılmasında maraqlıdır. Ölkəmizdə kənd təsərrüfatının inkişafı üçün münbit şərait var. Xüsusilə də neftin qiymətinin dünya bazarında düşməsindən sonra bu istiqamətdə ciddi irəliləyişlər nəzərə çarpır. Azərbaycan hökuməti kənd təsərrüfatının inkişafını prioritet sahə elan edib. Qəbul olunan “Strateji Yol Xəritəsi” adlı sənəddə bu sahənin inkişafı üçün konkret istiqamətlər göstərilib. Bu baxımdan da yaxın illərdə ölkənin kənd təsərrüfatı mallarının ixracına daha çox ehtiyacı yaranacaq. Təəssüflə qeyd etməliyik ki, Azərbaycan fermerləri öz mallarını Rusiyaya ixrac edərkən ciddi problemlərlə üzləşirdilər. Xüsusilə də gömrük-keçid məntəqələrində bu hallar daha çox müşahidə edilirdi. Yaş məhsulların isə orada bir neçə gün artıq saxlanması onların tamamilə zay olması ilə nəticələnirdi. Hesab edirəm ki, bu razılaşma belə maneələrin və süni əngəllərin qarşısını almış olacaq. Dövlət rəsmiləri arasında əldə olunan bu razılaşmanın bizim kənd təsərrüfatı sektorunun inkişafına ciddi təsiri olacaq. Bu o anlama gəlir ki, həmin 14 müəssisənin malları heç bir maneə olmadan Rusiya bazarlarına çatdırılacaq”.
Məhəmmədəli QƏRİBLİ
