Günel Fərhadqızı: “Möhkəm siyasi iradənin mövcud olduğu yerdə isə bütün baryerləri aşmaq çətin deyil”
Məlum olduğu kimi, Rusiya Federasiyasının iqtisadi inkişaf naziri Maksim Oreşkinin başçılıq etdiyi nümayəndə heyətinin Azərbaycan Prezidenti İlham Əliyevlə görüşü olub.
Prezident İlham Əliyev Azərbaycanla Rusiya arasında ikitərəfli münasibətlərin bütün sahələrdə uğurla inkişaf etdiyini vurğulayaraq, iqtisadi əməkdaşlığımızın daha da genişləndirilməsi, ticarət dövriyyəsinin artırılması ilə bağlı əlavə tədbirlərin görülməsinin vacibliyini qeyd edib, Rusiyaya Azərbaycan ixracatının artmasından məmnunluğunu bildirib.
Prezidentin ticarət dövriyyəsinin artırılması ilə bağlı əlavə tədbirlərin görülməsinin vacibliyinə işarə etməsi hansı addımların atılmasını zəruri edir?
Ekspert Günel Fərhadqızının sözlərinə görə, iki ölkə arasında iqtisadiyyat sahəsində əlaqələrin yüksək səviyyədə olduğunu demək mümkündür: “Qeyd edək ki, bu ilin 10 ayında Rusiya ilə Azərbaycan arasında ticarət dövriyyəsi 2,1 milyard dollar olub. Bu da ötən ilə nisbətən 51% çoxdur. Bu məbləğin 1,6 milyard dolları Rusiya ixracatının payına düşür. Ticarət dövriyyəsinin 1,5 milyard dolları isə qeyri-neft sektorunun payına düşür.
Hazırda Azərbaycanda Rusiya kapitallı 700-ə yaxın şirkət fəaliyyət göstərir. Bütün bunlar onu deməyə əsas verir ki, iki ölkə arasındakı ticari və iqtisadi münasibətlər sürətlə inkişaf edir. Ancaq biz görürük ki, ölkə başçısı İlham Əliyev bu vəziyyətdən tam razı deyil. O, Rusiya rəsmisilə keçirdiyi görüşdə ticarət dövriyyəsinin artırılması üçün əlavə tədbirlərin görülməsini zəruri hesab edib. Hesab edirəm ki, bu tədbirlər sırasına bir sıra istiqamətləri əlavə edə bilərik: iki ölkənin ticarəti üçün qanunvericilik aktlarının daha da təkmilləşməsi, gömrük siyasətinin yumşalması, qarşılıqlı investisya qoyuluşlarının təşviqi və artırılması. Bu istiqamətlər üzrə əlavə tədbirlər görülsə, bizim ölkələrimiz arasında olan dövriyyədəki artım tempi fantastik şəkildə yüksələ bilər. Bunu şərtləşdirən başqa amillər də var. Bu, iki ölkənin qonşu və tarixi bağlarla bir-birinə bağlı olması, əlverişli mübadilə infrastrukturunun mövcudluğu və xalqlarımızın bir-birinə böyük maraq göstərməsi biznesdə etimad mühitini daha da artırır. Sevindirici hal ondan ibarətdir ki, bunu hər iki ölkənin siyasi rəhbərliyi istəyir. Möhkəm siyasi iradənin mövcud olduğu yerdə isə bütün baryerləri aşmaq çətin deyil”.
Məhəmmədəli QƏRİBLİ
