Rəsul Cahangirli: “Məhsul mübadiləsinin daha da genişləndirilməsi baxımından bunun əhəmiyyəti böyükdür”
Xəbər verildiyi kimi, Bakıda Rusiya İxrac Mərkəzinin nümayəndəliyi açılıb. Rusiya-Azərbaycan İşgüzar Şurasının sədri Pyotr Fradkov Rusiya İxrac Mərkəzi barədə məlumat verərək mərkəzin Rusiya-Azərbaycan iqtisadi-ticarət əlaqələrinin genişləndirilməsində önəmli olacağını qeyd edib.
Onun sözlərinə görə, İxrac Mərkəzi iki ölkə arasında iqtisadi-ticarət əməkdaşlığının inkişafına, iş adamları arasında əlaqələrin genişləndirilməsinə töhfə verəcək. Bu, hər iki ölkənin maraqlarına xidmət edir. Onun fikrincə, RİM Rusiya müəssisələrinin xarici bazarlara çıxışının dəstəklənməsi, iş adamlarına gömrük, logistika, məhsulların sertifikatlaşdırılması sahəsində dəstək, yerli tərəfdaşların axtarışı üzrə məsləhət xidmətləri göstərir.
İqtisadiyyat naziri Şahin Mustafayev isə bildirib ki, iki ölkə arasında əlaqələr strateji tərəfdaşlıq səviyyəsinə yüksəlib. Azərbaycan Rusiya ilə əlaqələrin inkişafına xüsusi önəm verir. Azərbaycanın xaricdə ilk ticarət nümayəndəliyinin Rusiyada açılması da təsadüfi deyil.
Rusiyanın iqtisadi inkişaf naziri Maksim Oreşkin isə işgüzar görüşün mühüm əhəmiyyət daşıdığını bildirib. Ölkələr arasında ticarət-iqtisadi əməkdaşlığın inkişaf etdiyini deyən nazir dövriyyənin artımına əngəl olan maneələrin aradan qaldırılması istiqamətində iş görüldüyünü bildirib.
Qeyd edək ki, Bakıda nümayəndəliyi açılan RİM Rusiya müəssisələrinin xarici bazarlara çıxışının dəstəklənməsi, iş adamlarına gömrük, logistika, məhsulların sertifikatlaşdırılması sahəsində dəstək, yerli tərəfdaşların axtarışı üzrə məsləhət xidmətləri göstərir. Mərkəzin bir sıra ölkələrdə nümayəndəlikləri fəaliyyət göstərir.
Ümumilikdə, Bakıda Rusiya İxrac Mərkəzinin nümayəndəliyinin açılması iki ölkə arasında ticarət əlaqələrinin genişlənməsində necə rol oynayacaq?
Məsələyə münasibət bildirən ekspert Rəsul Cahangirlinin sözlərinə görə, bu, iki ölkə arasında iqtisadi-ticarət əlaqələrinin daha da inkişaf etməsinə təkan verəcək: “Son illər iki ölkə arasında iqtisadi-ticarət əlaqələri daha da inkişaf edir. Rusiya Azərbaycanla qonşu, eyni zamanda böyük bazara malik olan ölkədir. Coğrafi baxımdan da iki ölkənin yaxın olması iqtisadi-ticarət əlaqələrində müsbət amildir. Bunun sayəsində daşınma xərcləri azalır. Bu da məhsulun maya dəyərinə əlbəttə ki, müsbət təsir göstərir. Bakıda Rusiya İxrac Mərkəzinin fəaliyyətə başlaması bu ölkədən Azərbaycana məhsul gətirilməsini daha da yaxşılaşdıracaq. Eyni zamanda, Azərbaycandan qonşu ölkəyə bir sıra məhsulların ixrac edilməsinə münbit zəmin yaradacaq. O baxımdan da hər iki ölkə üçün iqtisadi baxımdan bu sərfəlidir. Hesab edirəm ki, hər iki dövlət bu imkanlardan maksimum səmərəli istifadə etməlidir. Elə məhsullar var ki, ancaq Azərbaycanda istehsal olunur. Elə məhsullar da var ki, yalnız qonşu Rusiyada hazırlanır. Məhsul mübadiləsinin daha da genişləndirilməsi baxımından bunun əhəmiyyəti böyükdür. O baxımdan hesab edirəm bundan mümkün qədər düzgün yararlanmaq lazımdır”.
Vidadi ORDAHALLI
