Rəşad Həsənov: “Əksər sahələrdə orta aylıq əməkhaqqının və təqaüdün artırılması gəlirin artmasına təsir göstərən faktorlardan biri hesab olunur”
Bu ilin 1 ayı üzrə əhalinin nominal gəliri açıqlanıb. Yanvar-noyabr aylarında Azərbaycan əhalisinin nominal gəlirləri əvvəlki ilin müvafiq dövrünə nisbətən 8,2 faiz artaraq 43389,9 milyon manata çatıb.
Dövlət Statistika Komitəsinin yaydığı məlumata əsasən, əhalinin hər nəfərinə düşən gəlirlər orta hesabla 4459,1 manat təşkil edib. Bu dövr ərzində gəlirlərin 84,8 faizi son istehlak xərclərinə, 8,5 faizi vergilər, sosial sığorta və könüllü üzvlük haqlarının, 1,8 faizi kreditlər üzrə faizlərin ödənilməsinə sərf edilib, 4,9 faizi isə yığıma yönəldilib. Bütün icbari və könüllü ödənişlər edildikdən sonra əhalinin sərəncamında 39692,4 milyon manatlıq vəsait qalıb.
Əhalinin gəlirinin artması barədə danışan iqtisadçı-ekspert Rəşad Həsənov “Bakı-Xəbər”ə açıqlamasında qeyd etdi ki, bunun bir neçə səbəbi ola bilər: “Əhalinin müəyyən bir qismi gəlirini xarici valyutada əldə edir. Neft sektorunda və xarici şirkərlərdə çalışanlar məvacibini xarici valyuta ilə əldə edir. Manatın məzənnəsinin dəyişməsindən sonra xarici valyuta ilə gəlirin həcmi artır”.
Həmsöhbətimiz onu da bildirdi ki, bəzi sahələrdə gəlirlərin artırılması istiqamətində müəyyən addımlar atılıb. Bura dövlət sektoru və digər sahələr aiddir. Əksər sahələrdə orta aylıq əməkhaqqı artırılıb.
İqtisadçının sözlərinə görə, cari ilin əvvəlində əhalinin pensiya təminatının indeksasiyası kimi hallar əhalinin gəlirinə öz təsirini göstərib. Təqaüdün artması gəlirin artmasına təsir göstərən faktorlardan biri hesab olunur.
R.Həsənov onu da vurğuladı ki, real sektorun bəzi sahələrində əməkhaqqı artıb. Təbii ki, bu kimi amillər əhalinin nominal gəlirinə təsir göstərir: “Həmçinin, istehsalın həcminin, məşğulluğun artması, yeni iş yerlərinin açılması əhalinin gəlirlərinə təsir göstərir. Qeyri-neft sektoruna yatırılan maliyyə kapitalı kənd təsərrüfatının tam gücü ilə inkişafına səbəb olur. Onu da vurğulamaq lazımdır ki, aqrar sahənin inkişafı əhalinin gəlirlərinə də təsir göstərir”.
Günel CƏLİLOVA
