Zakir Əhmədov: “Son illər regionlarda infrastrukturun yenidən qurulması ilə bağlı çox böyük işlər həyata keçirilib”
Regionların inkişafının sürətləndirilməsi dövlətin iqtisadi siyasətinin başlıca hədəflərindən biridir. Neftdən əldə edilən gəlirlərdən regionlarda həyata keçirilən layihələrə hər il milyardlarla manat vəsait ayrılır. Bu investisiyalar bölgələrdə sosial-iqtisadi inkişaf üçün ən vacib şərti - infrastrukturun yenidən qurulmasını və inkişafını təmin etmiş olur.
Regionların inkişafı ilə bağlı sistemli tədbirlər toplusu olan inkişaf proqramları məhz Azərbaycanın modernləşmə və tərəqqisinə xidmət edir. Bütövlükdə, regionların inkişafı ilə bağlı 2004-cü ildən başlayaraq həyata keçirilən təsirli və kompleks tədbirlərin icrasının mövcud tendensiyası, qazanılmış misilsiz nailiyyətlər bunu deməyə əsas verir.
Bu gün paytaxtda olduğu kimi, regionlarda da sosial infrastrukturun inkişafı maksimum diqqətdə saxlanır. Həyata keçirilən dövlət proqramları regionlarda infrastrukturun bərpası və inkişafı, əhalinin kommunal xidmətlərlə, o cümlədən elektrik enerjisi, qaz və su ilə təchizatının yaxşılaşdırılması, nəqliyyat, meliorasiya layihələri, səhiyyə və təhsil müəssisələrinin tikintisi, əhalinin sosial vəziyyətinin daha da yüksəldilməsi istiqamətində mühüm tədbirləri özündə birləşdirir. Çoxsaylı infrastruktur layihələri və regional inkişaf proqramlarının uğurla həyata keçirilməsi sayəsində ölkədə iqtisadi inkişaf üçün həm də güclü baza formalaşdırılıb. Belə ki, Azərbaycanın hər bir bölgəsində yeni, müasir tələblərə cavab verən infrastruktur yaradılır: elektrik stansiyaları tikilir, qaz və su kəmərləri çəkilir, yollar salınır.
Bütün bunların kompleks şəkildə həyata keçirilməsi Prezident İlham Əliyevin ictimai reytinqinə necə təsir edir?
Məsələyə münasibət bildirən ekspert Zakir Əhmədovun sözlərinə görə, bu kimi işlər Prezidentin cəmiyyətdə reytinqinin daha da yüksəlməsinə xidmət edir: “Əlbəttə, sözügedən işlərin görülməsi Prezidentin reytinqinə daha da müsbət təsir göstərir. Ölkə başçısına göstərilən etimadın daha da böyüməsinə öz təsirini göstərir. Zatən Prezident İlham Əliyevin Azərbaycan cəmiyyətində nüfuzu böyükdür. Bunu heç kəs dana bilməz və bu bir reallıqdır. Digər tərəfdən, onu da nəzərə almaq lazımdır ki, son illər regionlarda infrastrukturun yenidən qurulması ilə bağlı çox böyük işlər həyata keçirilib. Əksər kəndlər qazlaşdırılıb. Rayonlarda qazlaşdırmanın səviyyəsi əhəmiyyətli dərəcədə yüksəlib. Eyni zamanda, elektrik xətləri yenilənib, əhali fasiləsiz olaraq elektrik enerjisi ilə təmin olunur. Həmçinin, bölgələrin su təchizatı əvvəlki dövrlərlə müqayisədə xeyli yaxşılaşıb. Bölgələrdə yol infrastrukturu yenidən qurulub. Həmçinin, kəndlərarası yollara diqqət artmaqdadır. Çünki magistral yollarla bağlı işlərin böyük qismi həyata keçirilib. Əyalətlərdə infrastrukturun yenidən qurulması ilə yanaşı, regionlarda yeni iş yerlərinin açılmasına da xüsusi önəm verilir. Bu da, öz növbəsində, əyalətlərdən Bakıya axının azalmasına müsbət təsir göstərib. Bütün bunların ərsəyə gəlməsində Prezident İlham Əliyevin əməyi böyükdür. O üzdən, bu istiqamətdə görülən işlər ölkə başçısının cəmiyyətdə reytinqinin daha da artmasına öz müsbət təsirini göstərir. Çünki ötən illər ərzində bununla bağlı həqiqətən də çox böyük işlər görülüb”.
Vidadi ORDAHALLI
