“Bütün hallarda, sahibkarlıq fəaliyyəti ilə bağlı təsnifatın necə olmasından asılı olmayaraq əsas prioritet...”
İlqar Hüseynli: “Söhbət müəssisələrin dövriyyəsindən, fəaliyyət imkanlarından gedir”
Azərbaycanda sahibkarlıq subyektlərinin meyarlarına görə bölgüsü aparılacaq. Bununla bağlı “Sahibkarlıq fəaliyyəti haqqında” Qanuna yeni 4-1 (Sahibkarlıq subyektlərinin meyarlara görə bölgüsü) maddəsi əlavə edilir. Yeni maddəyə görə, sahibkarlıq subyektləri mikro, kiçik, orta və iri sahibkarlıq subyektlərinə bölünür. Mikro, kiçik, orta və iri sahibkarlıq subyektlərinin bölgüsü meyarları müvafiq icra hakimiyyəti orqanı tərəfindən təsdiq edilir.
Sahibkarlığın tənzimlənməsi tədbirləri çərçivəsində mikro, kiçik və orta sahibkarlıq subyektlərinə yönəldilən dövlət dəstəyi və güzəştlər bu maddədə nəzərdə tutulmuş meyarlar əsasında aparılır.
Layihə Milli Məclisin dekabrın 29-da keçiriləcək iclasında müzakirəyə çıxarılacaq.
Məlumat üçün qeyd edək ki, istər istehsal, istərsə də emal, xidmət və digər sahələrdə hər hansı bir fəaliyyət növü ilə işə başlayan, bu işin sahibi kimi fəaliyyət göstərmək sahibkarlıq deməkdir. Sahibkarlıq haqqında qanunvericiliklə bağlı orada bunun terminologiyası da qəbul olunub. Ancaq, bütün hallarda, müəyyən bir sahənin inkişafı ilə məşğul olmaq, nəticə etibarilə, sahibkarlığın formalaşması deməkdir.
Bütün bu deyilənlərin fonunda, sahibkarlıq fəaliyyətinin 4 subyektə bölünməsinə ekspertlər necə yanaşır? Məsələyə münasibət bildirən ekspert İlqar Hüseynli, prinsipcə, buna müsbət prizmadan yanaşdı: “Ümumən, sahibkarlıqla bağlı təsnifatlaşdırma şərti bir anlayışdır. Söhbət müəssisələrin dövriyyəsindən, fəaliyyət imkanlarından gedir. Fəaliyyət göstərdiyi coğrafi ərazinin genişliyinə görə o təsnifatlaşmalar həyata keçirilir. Bütün bunlarla yanaşı, kiçik və orta sahibkarlıq öz-özlüyündə ölkə üçün çox aktual mövzuya çevrilib. Məsələ ondadır ki, burada gələcəkdə sahibkarlıq subyektlərinin maliyyələşdirilməsi ilə bağlı müəyyənləşdirilmiş kvotanın dəyişilməsindən söhbət gedə bilər. Bütün bunlara rəğmən, sahibkarlıq fəaliyyəti ilə bağlı mahiyyət dəyişmir. Yəni mahiyyət olduğu kimi qalır. Ola bilsin ki, mikrosahibkarlıq fəaliyyəti ilə məşğul olanlar üçün dövlət tərəfindən ayrılan maliyyənin həcmi daha az olsun. Bütün hallarda, sahibkarlıq fəaliyyəti ilə bağlı təsnifatın necə olmasından asılı olmayaraq, əsas prioritet sahibkarlıq subyektlərinin inkişafı və onlara dəstəyin verilməsidir. Hesab edirəm ki, buna xüsusi önəm verilməlidir. Çünki istənilən ölkənin inkişafında kiçik və orta sahibkarlığın müstəsna rolu var. Ba baxımdan da biz maksimum çalışmalıyıq ki, ölkədə sahibkarlığın bütün növləri inkişaf etsin. Nəticə etibarilə bu, ölkənin inkişafına, əhalinin sosial vəziyyətinin daha da yaxşılaşmasına xidmət edəcək. Ona görə də bu istiqamətdə fəaliyyəti daha da genişləndirmək lazımdır”.
Vidadi ORDAHALLI
