Fikrət Yusifov: “Müstəsna hal kimi dövlət proqramı çərçivəsində hansısa sahənin inkişafı üçün qısa müddət ərzində vergidən azad oluna bilərlər”
Kiçik biznesin inkişaf etdirilməsi iqtisadiyyat üçün əsas şərtdir. Azərbaycan Prezidenti kiçik və orta sahibkarlığın inkişafı üçün hökumət tərəfindən mütəmadi olaraq tədbirlərin həyata keçirildiyini vurğulayıb.
Qeyd edək ki, ölkədə sahibkarlığın inkişafı qarşıya qoyulmuş iqtisadi siyasətin prioritetlərindəndir. Bu istiqamətdə ardıcıl olaraq dövlət-sahibkar münasibətlərinin inkişaf etdirilməsi, biznes mühitinə dair qanunvericiliyin və inzibati prosedurların təkmilləşdirilməsi, sahibkarlığa dövlət dəstəyinin genişləndirilməsi, maarifləndirmə, sahibkarların işgüzar əlaqələrinin inkişafı və müxtəlif növ xidmətlərin göstərilməsi kimi kompleks tədbirlər həyata keçirilib.
Kiçik və orta sahibkarlıqla məşğul olanlara dəstək vermək məqsədilə onların vergidən azad olunması təklif olunur. Bu günlərdəd belə bir təkliflə millət vəkili Adil Əliyev çıxış edib. Millət vəkili Vergi Məcəlləsinin müzakirəsi zamanı fikir səsləndirərkən qeyd edib ki, manatın devalvasiyasından sonra parlamentdə təmsil etdiyi Nərimanov rayonunda kiçik bizneslə məşğul olan əksər dükan sahibləri müflis olub. A.Əliyev kiçik bizneslə məşğul olan sahibkarların vergidən azad edilməsini təklif edib: “Sahəsi 5 kvadratdan 100 kvadratmetrədək olan dükanların, demək olar ki, əksəriyyəti bağlıdır. Bu insanlarin çoxu kiçik bizneslə məşğul olmaq üçün banklardan kredit götürüblər. Mən təklif edərdim ki, həmin ərazidə manitorinq aparılsın və bağlı qalan dükanların sahiblərinə 1-2 illik vergi amnistiyası tətbiq olunsun. Onlar müəyyən olunan müddət ərzində vergidən azad edilsinlər və bu amnistiyanın hesabına banklara olan borclarını bağlasınlar.
İqtisadçılar da kiçik sahibkarlıqla məşğul olanların vergidən azad olunması təklifini dəstəkləyirlər.
"Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifov “Bakı-Xəbər”ə açıqlamasında bildirdi ki, hər hansı bir sahənin inkişafı ilə bağlı müəyyən güzəştlər tətbiq oluna bilər: “Vergi qanunverciliyində biznesin inkişafı üçün güzəştlər paketi var. Dövlət tərəfindən özəl sektorun inkişafına şərait yaradılması yaxşı haldır. Sahibkarlıqla məşğul olanların tam olaraq vergidən azad olunması düzgün olmaz. Müstəsna hal kimi hansısa sahə qısa müddət ərzində vergidən azad edilə bilər. Ancaq kütləvi şəkildə kiçik və orta sahibkarlıqla məşğul olanları vergidən azad etsək, büdcənin hansı formada dolacağı sualı yaranır”.
Həmsöhbətimizin sözlərinə görə, müəyyən bir dövlət proqramı çərçivəsində hansısa sahənin inkişafı üçün güzəştlər tətbiq oluna bilər. Ancaq bu, müvəqqəti xarakter daşımalıdır. Azad sahibkarlığın inkişafı üçün yetərincə güzəştlər tətbiq olunur: “Vergi yoxlamalarının dayandırılması, güzəştli kreditlərin ayrılması kimi faktlar biznesin inkişafına səbəb olan faktorlardır”.
Günel CƏLİLOVA
