Əli Əlirzayev: “Muxtar Respublikadan ixrac olunan məhsulların rüsumlardan azad edilməsi ticarət əlaqələrinə ciddi impuls verəcək”
Dekabrın 20-də Türkiyə Respublikasının baş naziri Binəli Yıldırım Naxçıvan Muxtar Respublikasında səfərdə olub. Naxçıvan Muxtar Respublikası Ali Məclisinin sədri Vasif Talıbovla Türkiyənin baş naziri B.Yıldırım arasında görüş keçirilib. Muxtar Respublikanın yaranma tarixi və müasir inkişafı barədə məlumat verən Naxçıvan MR Ali Məclisinin sədri Naxçıvan şəhərinin 2018-ci il üçün İslam mədəniyyətinin paytaxtı seçildiyini vurğulayıb.
V.Talıbov xarici ticarət dövriyyəsində Türkiyə Respublikasının payının bu ilin 11 ayında ötən ilə nisbətən 2 milyon dollar artaraq 7 milyon 685 min dollar təşkil etdiyini bildirib. Qardaş ölkə hökumətinin qəbul etdiyi yeni tənzimləmə qərarına əsasən, Naxçıvan MR-in istehsal müəssisələrinə Türkiyəyə məhsul ixracında sərbəst ticarət imkanının verilməsi də xarici ticarət dövriyyəsinin artırılması baxımından mühüm əhəmiyyətə malikdir.
2009-cu ildən sonra yenidən qədim Naxçıvan torpağına səfərindən məmnunluğunu bildirən B.Yıldırım ötən bu müddət ərzində Naxçıvanın böyük inkişafa nail olduğunu vurğulayıb. Onun fikrincə, ölkələrimiz arasında münasibətlər son 15 ildə sürətlə inkişaf edib. Türkiyənin baş naziri bu yaxınlarda istifadəyə verilən Bakı-Tiflis-Qars dəmir yolu xəttinin münasibətlərin daha da inkişaf etdirilməsində xüsusi yer tutduğunu diqqətə çatdırıb.
Bununla yanaşı, görüşdə İğdırın və Naxçıvanın hava limanları arasında əməkdaşlığın inkişaf perspektivləri barədə də fikir mübadiləsi aparılıb.
Yuxarıda qeyd olunduğu kimi, əvvəlki illərə baxanda Naxçıvanla Türkiyə arasında ticarət dövriyyəsinin həcmi artan xətt üzrə inkişaf edir. Bütün bu deyilənlərin fonunda, xarici ticarət əlaqələrində Türkiyə faktoru Naxçıvan MR üçün nə deməkdir?
Məsələyə münasibət bildirən iqtisadçı-alim Əli Əlirzayevin sözlərinə görə, Naxçıvanın ticarət əlaqələrində Türkiyə önəmli rola malikdir: “Doxsanıncı illərdə yaranan blokada ilə əlaqədar olaraq Naxçıvanda Türkiyə amili mühüm rol oynadı. Yəni Naxçıvanın həyatını, indiki müasir vəziyyətini saxlamaq üçün Türkiyə amili əsas rol oynayır. Türkiyə olmasaydı, o zaman Naxçıvanda aclıq ola bilərdi. Ona görə də sözügedən amilə adi yanaşmaq olmaz. Bunun çox önəmli əhəmiyyəti var. Türkiyə çətin dövrlərdə həm iqtisadi dəstək verib, həm də siyasi dəstək. İndiki şəraitdə ticarət dövriyyəsinin artmağa doğru getməsi yaxşı haldır. Nəzərə almaq lazımdır ki, mərhum Heydər Əliyevin Naxçıvana rəhbərlik etdiyi dövrdə - 1992-ci ilin mayında Türkiyə ilə Muxtar Respublika arasında Ümid körpüsü tikildi. Həmin körpünün hesabına gediş-gəliş artdı və iqtisadi-ticarət əlaqələri genişlənməyə başladı. Bunun sayəsində həm gediş-gəliş, həm də ticarət əlaqələri xeyli artıb. O cümlədən, humanitar əlaqələr də genişlənib. Naxçıvanda bəzi xəstələr müalicə olunmaq üçün Ərzuruma gedirlər və s. Digər tərəfdən, Türkiyənin Naxçıvandan ixrac olunan məhsulları rüsumlardan azad etməsi ticarət əlaqələrinə ciddi impuls verəcək. Bütün bunlar Naxçıvanda istehsal olunan məhsulların bazarını genişləndirir. Çünki Naxçıvan bazarı Türkiyə bazarı ilə sıx əlaqədədir. Şərurda, Ordubadda istehsal olunan məhsulların Türkiyə bazarına ixrac olunması iqtisadi baxımdan sərfəlidir. Bu, ticarət əlaqələrinin daha da genişlənməsinə stimul yaradır. Rüsumların götürülməsi Naxçıvan əhalisinin sosial vəziyyətinin yaxşılaşmasına müsbət təsir göstərəcək. Bütün bunlar həm də mədəni əlaqələrin genişlənməsinə öz töhfəsini verir”.
Vidadi ORDAHALLI
