Aydın Hüseynov: “Bu gedişlə digər dünya ölkələrində də böyük layihələr həyata keçirəcək”
Xəbər verildiyi kimi, SOCAR-ın İsveçrədəki törəmə şirkəti “SOCAR Energy Holdings” Avstriyanın pərakəndə yanacaq satışı bazarına daxil olaraq, “A1” şirkətinə məxsus yanacaqdoldurma məntəqələrini (YDM) və neft yağlarının ticarəti sahəsində fəaliyyət göstərən “Pronto Oil” firmasını alıb.
Həmçinin, “SOCAR Energy Holdings” son 5 ildə İsveçrədə əldə etdiyi gəlirlərin bir hissəsini daunstrimdəki sərmayələrini artırmaq və böyütmək məqsədilə investisiya layihələrinə yatırır, əvvəlki illərdə qoyulan investisiyaları ilə sinerji yaradaraq, onları daha da genişləndirir. Burada əsas hədəf gələcəkdə gəlir mənbələrini şaxələndirməklə, yeni bazarların potensialından yararlanmaq və Azərbaycan iqtisadiyyatına daha böyük gəlirlər qazandırmaqdır.
Qeyd edək ki, SOCAR beynəlxalq miqyasda əlaqələrini get-gedə daha da genişləndirir. Bir sıra ölkələrdə investisiya layıhələri həyata keçirir. Təsadüfi deyil ki, bu ilin noyabrında Prezident İlham Əliyev SOCAR-ın bu yöndə fəaliyyətini yüksək qiymətləndirərək şirkətin Azərbaycanın milli sərvəti olduğunu deyib: “Əsrin kontraktı”, “Şahdəniz” yatağı üzrə imzalanmış və icra edilən kontrakt, eyni zamanda Dövlət Neft Şirkətini böyük beynəlxalq şirkətə çevirib. Yəni bir neçə il bundan əvvəl mənim tərəfimdən qarşıya məqsəd qoyulmuşdur ki, SOCAR böyük beynəlxalq neft şirkətinə çevrilməlidir. Biz bu məqsədlə SOCAR-ın fəaliyyətini genişləndirdik, bir çox müəssisələr SOCAR-a verildi. Bu gün həm ölkə daxilində, həm xaricdə Azərbaycan Dövlət Neft Şirkətinin çox böyük fəaliyyəti var. Digər ölkələrdə, Avropa ölkələrində, yaxın qonşuluqda SOCAR-ın çox böyük işləri, sərmayəsi var. Azərbaycan dövləti SOCAR-ın fəaliyyətini dəstəkləyir. Bu bizim iqtisadi gücümüzü artırır, bizə gələcəkdə yeni mənbələrdən böyük həcmdə valyuta axını da təmin ediləcək”.
Ümumilikdə, SOCAR-ın beynəlxalq miqyasda əldə etdiyi bu uğurları ekspertlər necə dəyərləndirirlər?
Məsələyə münasibət bildirən millət vəkili Aydın Hüseynovun sözlərinə görə, SOCAR son illər bu sahədə bir sıra nailiyyətlərə imza atıb: “SOCAR Azərbaycan şirkəti olaraq bir sıra beynəlxalq layihələrdə iştirak edir. Neft kontraktlarında əsas podratçı təşkilatlardan biridir. SOCAR-ın uğurları o qədər böyükdür ki, adı BP və dünyada tanınan digər böyük şirkətlərlə yanaşı çəkilir. Neftin hasil olunması və emalında ən yüksək texnologiyalardan istifadə edir. Bu da SOCAR-da işin yüksək peşəkarlıq səviyyəsində qurulmasının əyani göstəricisidir. Şirkətin xaricdə belə uğurlu fəaliyyət göstərməsi çox böyük göstərici hesab olunur. Eyni zamanda, bu, Azərbaycan iqtisadiyyatı üçün çox önəmli bir faktdır. Ümumilikdə götürəndə SOCAR bir Azərbaycan şirkəti olaraq özünü doğruldub və ölkə iqtisadiyyatında önəmli payı var. Başlıca məqamlardan biri də ondan ibarətdir ki, SOCAR xaricdə həyata keçirdiyi böyük layihələrin timsalında Azərbaycanın neft ənənələrini davam etdirir və ölkə iqtisadiyyatında önəmli rol oynayır. Hesab edirəm ki, SOCAR-ın əldə etdiyi uğurlar davamlı olacaq. Bu gedişlə digər dünya ölkələrində də böyük layihələr həyata keçirəcək. Bütövlükdə, SOCAR-ın həyata keçirdiyi layihələr Azərbaycan iqtisadiyyatı üçün böyük perspektivlər vəd edir. Yəni bunun nəticəsində Azərbaycana böyük həcmdə valyuta gəlirlərinin daxil olacağı gözlənir. Bu da ölkə iqtisadiyyatının daha da inkişaf edib çiçəklənməsinə öz töhfəsini verəcək”.
Vidadi ORDAHALLI
