Könül Nuriyeva: “Növbəti illərdə ölkəyə gələcək turistlərin sayını artırmaq lazımdır ki, onların xərclədiyi vəsait daha da artsın” Pərviz Heydərov: “Hesab edirəm ki, qısa müddət ərzində qeyd olunan rəqəmi 3 milyard dollara çatdıra biləcəyik”
Azərbaycan turizmi artıq inkişaf dövrünü yaşayır. Son illər ölkəyə gələn turistlərin sayı artmaqda davam edir. Ölkə iqtisadiyyatının inkişafında turizm aparıcı rol oynayır.
Bu günlərdə keçirilən Beynəlxalq Miqrant Günü ilə bağlı tədbirdə son illər ərzində turizmin Azərbaycan iqtisadiyyatının şaxələndirilməsi işində aparıcı sahələrdən birinə çevrilməsi barədə müzakirə aparılıb.
Mədəniyyət və turizm nazirinin müavini Nazim Səmədov bildirib ki, ötən ilin müvafiq dövrü ilə müqayisədə bu ilin 11 ayı ərzində Azərbaycana gələn turistlərin sayı 20 faiz artıb və 2 milyon 477 mindən artıq olub.
N.Səmədov onu da qeyd edib ki, ölkəmizə gələn xarici turistlər 1.3 milyard dollar, Azərbaycandan xaricə gedən turistlər isə 1.2 milyard dollar xərcləyiblər. 100 milyon dollar müsbət saldo yaranıb ki, bu da təqdirəlayiq haldır.
Məsələ ilə bağlı fikir bildirən iqtisadçı-ekspert Könül Nuriyeva “Bakı-Xəbər”ə açıqlamasında qeyd etdi ki, bu il ölkəyə gələn turistlərin sayı ötən dövrlərlə müqayisədə artıb. Bunun səbəbi ilk növbədə ölkədə keçirilən beynəlxalq əhəmiyyətli yarışlarla bağlıdır: “Bəllidir ki, bu il keçirilən "Formula-1" Qran-pri yarışı, İslam Həmrəyliyi Oyunları və Bakı Şopinq Festivalı turist axınının artmasında əsas rol oynayıb. Xüsusilə qeyd edim ki, Bakı Şopinq Festivalının ölkəmizdə keçirilməsi turistlərin marağına səbəb oldu. Bu festival yerli istehsalçılarla yanaşı, xaricilərin də diqqətini cəlb etdi”.
K.Nuriyevanın fikrincə, ölkəmizə gələn xarici turistlərin 1.3, xaricə gedən turistlərin isə 1.2 milyard dollar xərcləməsi müsbət saldo hesab olunur. Ancaq 100 minlik fərq müsbət saldo hesab olunsa da, o qədər də yüksək rəqəm deyil. Daxil olan valyuta nə qədər yüksək olsa, bir o qədər yaxşıdır: “Qeyd olunan rəqəmləri müqayisə edəndə bir-birinə bərabər balans yaranır. Növbəti illərdə çalışmaq lazımdır ki, mədaxil daha çox artsın”.
İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov qəzetimizə açıqlamasında bildirdi ki, qeyri-neft sektorunun inkişafı qarşıya qoyulan məqsədlərdən biridir. Bunun da mühum məsələlərindən biri turizm sektorudur. Ölkədə turizmin inkişafı üçün neçə illərdir müvafiq şəraitin yaradılması, infrastrukturun təşkil olunması istiqamətində müəyyən işlər görülüb. Görülən işlərin nəticəsi olaraq son illər ölkəyə turist axınında ciddi yüksəlmə qeydə alınıb. Bundan əlavə, turist axınının genişlənməsində ölkəmizdə keçirilən mötəbər yarışların rolu danılmazdır. Son bir il ərzində isə ölkəmizə əsasən Yaxın Şərq ölkələrindən böyük turist axını qeydə alındı. Bu uğurlar aparılan işlərin nəticəsindən xəbər verir”.
Həmsöhbətimizin sözlərinə görə, ölkəmizə gələn turistlərin 1,3 milyard dollar xərcləməsi ölkə iqtisadiyyatına müsbət təsir göstərir: “Qeyri-neft sektorunun inkişafında əsas hədəfimizin ölkəyə xarici valyuta axınının genişlənməsi olduğunu nəzərə alsaq, qısa müddət ərzində bu qədər vəsaitin turistlər tərəfindən ölkəmizdə xərclənməsi müsbətdir. Gələcəkdə bu sahəni daha da inkişaf etdirmək lazımdır ki, turizm sektorundan əldə olunan gəlirin həcmi daha da artsın. Hesab edirəm ki, qısa müddət ərzində qeyd olunan rəqəmi 3 milyard dollara çatdıra biləcəyik”.
Günel CƏLİLOVA
