Əli Əlirzayev: “Aqrar sektor ölkəyə valyutanın daxil olmasına, daxili bazarda yerli istehsal məhsullarının satışa çıxarılmasına şərait yaradır”
Beynəlxalq Valyuta Fondu gələn il Azərbaycanın qeyri-neft sektorunda 4 faizlik artım olacağını proqnozlaşdırır. Azərbaycanda yaxın gələcəyə dair iqtisadi artım perspektivi müsbətdir. Gələn il dövlət investisiya xərclərinin və sosial xərclərin artımı fonunda qeyri-neft sektorunda 4 faizlik artım gözlənir.
Bu sözlər 2018-ci il üzrə IV Maddə Məsləhətləşmələri çərçivəsində müzakirələr aparmaq üçün 30 noyabr – 14 dekabr tarixlərində Bakıda səfərdə olan Beynəlxalq Valyuta Fondunun missiyasına rəhbərlik edən Məhəmməd əl-Qorçinin bu səfərin yekununa dair yayılan bəyanatında yer alıb.
Bəyanatda deyilir ki, neft sektorunda azalma davam edəcək: “Ümumiyyətlə, 2018-ci il üzrə iqtisadi artım 2 faiz səviyyəsində proqnozlaşdırılır, ortamüddətli dövr ərzində isə qaz yataqlarının işlənməsinə başlandıqdan sonra 3.5 - 4 faiz arasında olması planlaşdırılır. Baza ilinin təsirləri tükəndikcə inflyasiya dərəcəsi 2018-ci ildə 7 faizədək, sonra isə tədricən daha aşağı düşəcək”.
İqtisadçı ekspert Əli Əlirzayev “Bakı-Xəbər”ə açıqlamasında qeyd etdi ki, 2018-ci ildə Azərbaycanın qeyri-neft sektorunun bir sıra sahələrində artım gözlənir: “Əsasən kənd təsərrüfatı və turizm sahəsində yaşanacaq inkişaf qeyri-neft sektorunun inkişafına təkan verəcək. İxracat potensialı kənd təsərrüfatı məhsullarının bazarının genişlənməsi hesabına baş verəcək. Aqrar məhsulların xarici ölkələrə çıxarılması əldə olunacaq gəlirin artmasına səbəb olacaq. Əsas artım hazırda aqrar, turizm və infastrukturda gözlənir”.
Həmsöhbətimizin sözlərinə görə, qarşıya qoyulan məqsədlərdən biri turizmi inkişaf etdirməkdir. Artıq Azərbaycan bu hədəfə çatmaq üzrədir. Ölkəmizdə keçirilən beynəlxalq əhəmiyyətli yarışlar Azərbaycanın turizm ölkəsi kimi tanınmasına səbəb olur.
Ə.Əlirzayevin sözlərinə görə, aqrar sektor ölkəyə valyutanın daxil olmasına, daxili bazarda yerli istehsal məhsullarının satışa çıxarılmasına şərait yaradır: “Yəni vətəndaşlarımız yerli məhsullardan daha çox istifadə edə bilir. Kənd təsərrüfatı məşğulluğun təmin edilməsi baxımından da önəmlidir. Azərbaycanda məşğul əhalinin 37 faizindən artığı kənd təsərrüfatı sahəsində çalışır. Deməli, aqrar sektor həm də məşğulluğun təmin olunması baxımından vacibdir. Kənd təsərrüfatında iqtisadi artım əvvəlki dövlərlə müqayisədə çoxalıb. Bu isə sözügedən sahədə artım tendensiyasının qorunub saxlanmasından xəbər verir. Bu, həm də fermerlərin gəlirlərinin artması baxımından olduqca vacib bir rəqəmdir”.
Günel CƏLİLOVA
