Natiq Cəfərli: “Azərbaycanın fiziki şəxsləri və investorları bitkoinə maraq göstərirlər” Rəşad Camal Mehdiyev: “Qeyri-neft ixracı ilə bərabər, müasir texnologiyanın məhsulu olan, dəyəri sürətlə artan bitkoin və digər virtual pullar ölkəmizə böyük məbləğdə valyuta gətirə bilər”
Bu gün bütün dünyanın ən çox müzakirə etdiyi mövzulardan biri də bitkoindir. O cümlədən ölkəmizdə də bitkoin və digər virtual pullar müzakirə mövzusuna çevrilib. Maraqlıdır, bitkoin Azərbaycana ciddi məbləğdə valyutanın daxil omasını təmin edə bilərmi? Bu pul ölkəmiz üçün hansı imkanlar açır?
İqtisadçı-ekspert Natiq Cəfərli “Bakı-Xəbər”ə açıqlamasında qeyd etdi ki, Azərbaycanda bitkoinin istehsalı olmalıdır ki, bunu kimlərsə satışa çıxarıb valyuta əldə etsin: “Məndə olan məlumata görə, Azərbaycanda bitkoin mədənləri yox səviyyəsindədir. Ancaq ölkəmizdə bitkoinə maraq göstərənlər yetərincədir. Bundan müəyyən dərəcədə qazanc əldə edənlər də var. Xüsusi olaraq bildirim ki, virtual valyuta risqli yatırımdır. Elektron kriptovalyutanın yalnız xəbərlər üzərindən qiymətinin artmasını müşahidə edirik. Arxasında ciddi faktorlar yoxdur. Bu səbəbdən bitkoinə yatırım edən şirkətlət daim stress altındadırlar, çünki istənilən zaman onun məzənnəsi kəskin şəkildə düşə bilər. Azərbaycanın fiziki şəxsləri və investorları bitkoinə maraq göstərirlər”.
“ETI - eTicarət İcması”nın təsisçisi Rəşad Camal Mehdiyev hesab edir ki, qeyri-neft ixracı ilə bərabər, müasir texnologiyanın məhsulu olan, dəyəri sürətlə artan bitkoin və digər virtual pullar ölkəmizə böyük məbləğdə valyuta gətirə bilər: “Bitkoin ölkəmizə dollar gətirmək vasitələrindən biridir. Bitkoin investisiya alətidir. Mənə belə gəlir ki, Mərkəzi Bank, banklar və digər investisiya qurumlarımız bu məsələnin üzərində işləsə, ölkəmizə ciddi məbləğdə valyuta daxil ola bilər. Virtual valyutalara investisiyalardan ölkəmizə turizmdən qat-qat çox valyuta daxil ola bilər. 2017-ci ilin əvvəlində bir bitkoinin qiyməti təxminən 1000 dollar idi. Ötən müddət ərzində bitkoin 17 dəfədən çox bahalaşıb və hazırda qiyməti 17 min dollardan çoxdur. Sadə şəkildə desək, ilin əvvəlində 100 milyon dollarlıq bitkoin alsaydıq, bu gün ölkəmizə 1 milyard 700 milyon dollar valyuta daxil ola bilərdi. Müqayisə üçün qeyd edim ki, 2017-ci ilin yanvar-oktyabr aylarında Azərbaycandan 1 milyard 218,7 milyon dollar dəyərində qeyri-neft məhsulları ixrac edilib. Bu gözəldir. Eyni zamanda, biz 100 milyon dollar investisiya ilə qeyri-neft ixracatımızdan daha çox valyuta daxil olmasına nail olardıq”.
Günel CƏLİLOVA
