Aydın Hüseynov: “Bununla bağlı görülən işlər öz müsbət nəticəsini verəcək”
Xəbər verildiyi kimi, Nazirlər Kabineti aparatının strukturunda ştatların sayı artırılıb. Belə ki, sözügedən yeniliklər Nazirlər Kabinetinin “Azərbaycan Respublikası Nazirlər Kabineti Aparatının strukturunun ştat cədvəli”ndə dəyişiklik edilməsi barədə 24 noyabr 2017-ci il tarixli Qərarında əksini tapıb. Nazirlər Kabinetinin 8 sentyabr 2017-ci il tarixli Qərarı ilə təsdiqlənən “Azərbaycan Respublikası Nazirlər Kabineti Aparatının strukturunun ştat cədvəli”ndə 200 ştat olub. Dəyişikliyə əsasən, ştatların sayı 205-ə çatdırılıb.
Bununla yanaşı, yeni qərara əsasən, baş nazirin köməkçilərinin sayı 7 nəfərdən 3 nəfərə endirilsə də, baş nazirin birinci müavininə daha bir köməkçi və 4 yeni baş məsləhətçi ştatları ayrılıb, Nazirlər Kabinetinin Hüquq şöbəsində aparıcı məsləhətçi ştatı yaradılıb. Normativ-hüquqi aktların sistemləşdirilməsi və arxiv işi üzrə sektorda da böyük məsləhətçilərin sayı artırılaraq 2 nəfərə çatdırılıb. Müraciətlərin qeydiyyatı və vətəndaşların qəbulu sektorunda da baş məsləhətçilərin sayı daha bir nəfər artırılaraq 2 nəfərə çatdırılıb.
Bütövlükdə, Nazirlər Kabinetində aparılan struktur dəyişiklikləri bu qurumun fəaliyyətinə, çevikliyinə necə təsir göstərəcək? Ümumən ekspertlərin Nazirlər Kabinetində aparılan struktur islahatlarına münasibəti necədir?
Məsələyə münasibət bildirən millət vəkili Aydın Hüseynov Nazirlər Kabineti Aparatının strukturunda aparılan dəyişikliklərə müsbət prizmadan yanaşdı. Onun fikrincə, bu, qurumun daha çevik və dinamik işləməsinə öz müsbət təsirini göstərəcək: “Nazirlər Kabinetinin strukturunda ştat vahidləri ilə bağlı müəyyən dəyişikliklərin edilməsi normal haldır. Bu, müəyyən çağırışlardan irəli gəlir. Çünki müəyyən dövr keçdikcə, zamanın tələbinə uyğun olaraq, çağırışlar dəyişir. Eyni zamanda, yaxşı mənada, bütün bunların hamısının təşkil olunması üçün çeviklik tələb olunur. O üzdən, müasir iqtisadi çağırışlara uyğun olaraq islahatların aparılması məhz bu istiqamətə yönəlib. Buna da normal yanaşmaq lazımdır. O baxımdan hesab edirəm ki, məlum yeniliklər Nazirlər Kabinetinin daha çevik olmasını və müasir çağırışlara daha adekvat cavab verməsini təmin edəcək. Çünki dünyanın bir sıra inkişaf etmiş ölkələrində zaman-zaman bənzər islahatlar aparılıb. Bunlar da, öz növbəsində, qurumun daha yaxşı fəaliyyət göstərməsinə gətirib çıxarıb. Nəzərə almaq lazımdır ki, Nazirlər Kabineti hökumətin fəaliyyətində önəmli rola malikdir. O üzdən, bizdə də bu istiqamətdə aparılan işlərə, yeridilən məqsədyönlü siyasətə müsbət yanaşıram. Fikrimcə, bununla bağlı görülən işlər öz müsbət nəticəsini verəcək”.
Vidadi ORDAHALLI
