Əkrəm Həsənov: “Həm vətəndaşlar, həm də şirkətlər banklarda vəsait saxlamağa ehtiyat edirlər”
Azərbaycanda bank ehtiyatlarının həcmi açıqlanıb. Mərkəzi Bankın yaydığı aylıq hesabatda Azərbaycan banklarının ehtiyatlarının il ərzində 15 faiz azaldığı qeyd olunub.
Məlumat üçün bildirək ki, 2017-ci il noyabrın 1-dək Azərbaycanda bank ehtiyatları 2,11 milyard manat təşkil edib. Hesabata əsasən bu, ötən ilin eyni dövrü ilə müqayisədə 14,9 faiz azdır. Ötən il bu rəqəm 2,48 milyard manat təşkil edib. 2017-ci il oktyabrın sonunda ölkədə genişləndirilmiş pul bazası 9,83 milyard manata bərabər olub. Bu rəqəm ötən ilin oktyabrı ilə müqayisədə 11,8 faiz çoxdur. Ötən ilin oktyabrında bu, 8,79 milyard manat təşkil edib.
Hesabatda qeyd olunur ki, bu il noyabrın 1-dək manatda pul bazası 8,53 milyard manat olub. 2016-cı ilin oktyabrında bu, 7,45 milyard manata bərabər olub.
Hesabat dövründə dövriyyədə nağd pulun həcmi 7,67 milyard təşkil edib, 2016-cı il noyabrın 1-dək isə bu rəqəm 6,29 milyard manat olub.
Onu da qeyd edək ki, 2017-ci ilin oktyabrında dövriyyədə olan nağd pul kütləsinin pul bazasına nisbəti 78,1 faiz təşkil edib ki, bu da ötən ilin eyni dövrü ilə müqayisədə 6,6 faiz artıb.
Azərbaycan banklarının ehtiyatları nə səbəbdən azalır?
Məsələ ilə bağlı bank sahəsi üzrə mütəxəssis Əkrəm Həsənova müraciət etdik. O, “Bakı-Xəbər”ə açıqlamasında qeyd etdi ki, Azərbaycan bankları cəlb etdiyi vəsaitlər üzrə Mərkəzi Bankda vəsait saxlayırlar: “Bank ehtiyatlarının azalmasının əsas səbəbi yatırılan əmanətlərin həcminin azalmasıdır. Məlumdur ki, banklar nə qədər çox əmanət cəlb edə bilirsə, bir o qədər də çox depozit saxlayırlar. Cəlb edilən əmanətlərin həcmi azaldıqca, Mərkəzi Bankda saxlanan yatırımların həcmi də azalır. 2016-cı il martın 3-dən etibarən milli valyuta, qiymətli metallarla cəlb edilmiş depozitlər üzrə 0,5 faiz, xarici valyutada isə 1 faiz saxlanır”.
Həmsöhbətimiz onu da əlavə etdi ki, bu gün Azərbaycan banklarına etimad sarsılıb. Həm vətəndaş, həm də şirkətlər banklarda vəsait saxlamağa ehtiyat edirlər: “Belə olan halda, bankların əmanət bazası azalır. Təbii ki, əmanət bazası azaldığı halda Mərkəzi Bankda saxlanan ehtiyat da azalmalıdır”.
Günel CƏLİLOVA
