Vüqar Bayramov: “Gələn il daha çox canlanmanın müşahidə olunacağı sektor…”
BMT 2018-ci ildə Azərbaycan iqtisadiyyatının 1,8 faiz artacağını proqnozlaşdırır. Bu barədə təşkilatın İqtisadi və sosial məsələlər departamentinin hazırladığı “Dünya iqtisadiyyatının vəziyyəti və perspektivlər” adlı hesabatda deyilir. Hesabata əsasən, 2017-ci ildə Azərbaycanın ÜDM-i 1 faiz azalacaq, 2019-cu ildə isə 2,3 faiz artacaq.
O da qeyd olunur ki, 2018-2019-cu illərdə ölkə iqtisadiyyatının bərpasına “Şahdəniz” qaz-kondensat yatağının işlənməsinin ikinci mərhələsi çərçivəsində qaz hasilatına başlanması da kömək edəcək.
Məlumat üçün bildirək ki, BMT-nin 2018-ci ilə proqnozları Azərbaycan hökumətinin gözləntilərini üstələyir. Belə ki, hökumət 2018-ci ildə ÜDM-in real artımını 1,5 faiz səviyyəsində proqnozlaşdırır. Hökumət 2017-ci ildə iqtisadi artımın 0,3 faiz səviyyəsində olacağını gözləyir.
2018-ci ildə Azərbaycan iqtisadiyyatında artımın qeydə alınması ilə bağlı fikir bildirən iqtisadçı-ekspert Vüqar Bayramovun sözlərinə görə, növbəti il bir sıra sahələrdə inkişaf dövru yaşanacaq: “2018-ci ildə həm Azərbaycan hökuməti, həm də beynəlxalq maliyyə qurumları, o cümlədən Beynəlxalq Valyuta Fondu, Dünya Bankı Azərbaycan iqtisadiyyatında artım olacağını proqnozlaşdırırlar. Artımın orta hesabla 1,5 faiz olacağı gözlənir. Bu birbaşa onunla bağlıdır ki, 2017-ci ildə iqtisadiyyat stabil olub və bu stabillik 2018-ci ildə artım üçün də imkan yaradır. Həmçinin 2018-ci il üçün vacib məqamlardan biri Azərbaycanın mavi qazını TANAP layihəsi ilə nəql etmək niyyətində olmasıdır ki, bu, əlavə olaraq 6 milyard kubmetr qazın Türkiyə bazarlarına ixrac edilməsi deməkdir. Təbii ki, bu da ölkəyə daxil olan vəsaitin həcminin artmasına və ÜDM-də artımlara gətirib çıxara bilər.
Gələn il daha çox canlanmanın müşahidə olunacağı sektor güman olunur ki, inşaat sektoru olacaq. Bir tərəfdən tikinti üçün büdcədən ayrılan vəsaitlərin həcmi artırılıb ki, nəticədə bu, tikinti sahəsinə daha çox sərmayənin cəlb olunmasına imkan verəcək, digər tərəfdən isə Mərkəzi Bank manatın məzənnəsindəki bu stabilliyi qoruyub saxlaya biləcəksə, o zaman daşınmaz əmlak bazarında da canlanmanın yaranması müşahidə ediləcək. Güman edirik ki, 2018-ci ilin birinci yarısında daşınmaz əmlak bazarında durğunluq davam edəcək, amma ikinci yarısında canlanma müşahidə edilə bilər.
Aqrar sahədə eyni hal müşahidə olunacaq. Bu sahədə təxminən 3 faiz ətrafında artımın olacağı gözlənir. Ölkənin ixracatında, xüsusilə Rusiya ilə çətinliklər olmasa, bu, tərəvəz və meyvə istehsalının daha çox artmasına gətirib çıxara bilər”.
Günel CƏLİLOVA
