Zakir Əhmədov: “Nəzərə almaq lazımdır ki, neft-qaz sektoru Azərbaycan iqtisadiyyatında önəmli rola malikdir”
Bəzi şirkətlərdə kibertəhlükəsizlik üzrə işlər gücləndirilir. Belə ki, “Kasperski Laboratoriyası” Azərbaycanın neft-qaz sənayesi şirkətlərinin texniki işçiləri üçün kibertəhlükəsizlik üzrə məşğələlər təşkil edəcək.
Sözügedən məsələ ilə bağlı mətbuata açıqlama verən “Kasperski Laboratoriyası”nın kritik infrastrukturun təhlükəsizliyi biznesinin inkişafı üzrə direktoru Andrey Suvorovun sözlərinə görə, sənaye kibermüdafiəsinin təmin olunması prosesi kifayət qədər qəlizdir. Çünki sistemin tətbiq olunmasına qədər müəssisənin işi ilə tanış olmaq vaxt tələb edir.
O da məlumdur ki, müasir dövrdə informasiya-kommunikasiya texnologiyalarının inkişafı kibercinayətkarlığın meydana gəlməsinə və gündən-günə artmasına gətirib çıxarır. Birləşmiş Millətlər Təşkilatının hesabatında hər il 2 milyondan çox insanın internet vasitəsilə edilən cinayətlərin qurbanı olduğu və kibercinayət xarakterli fəaliyyət nəticəsində dəymiş ümumi ziyanın 1 milyard ABŞ dolları təşkil etdiyi bildirilir. Kibercinayətkarlığın artması bütün dünyada dövlət idarəçiliyi, bank, nəqliyyat, milli təhlükəsizlik və digər sistemlərin təkmilləşdirilməsini, kibermüdafiə tədbirlərinin genişləndirilməsini aktual edir. Artıq ABŞ, Rusiya, Çin, İngiltərə, Fransa, Almaniya və bir sıra başqa inkişaf etmiş dövlətlər öz xüsusi kiber qoşunlarını yaradıblar.
Bütün bu deyilənlərin fonunda, Azərbaycanın neft-qaz sənayesi şirkətlərinin texniki işçiləri üçün kibertəhlükəsizlik üzrə məşğələlərin təşkil edilməsinə ekspertlər necə yanaşırlar? Məsələyə münasibət bildirən ekspert Zakir Əhmədovun sözlərinə görə, neft-qaz sahəsində bu istiqamətdə işlərin sürətləndirilməsi məqsədəuyğundur: “Hesab edirəm ki, bu sahədə çalışanların maarifləndirilməsi mühüm əhəmiyyət kəsb edir. Çünki bu sahə Azərbaycan iqtisadiyyatında önəmli rola malikdir. Nəzərə almaq lazımdır ki, dünyanın sürətlə inkişaf edən ölkələrindən biri kimi Azərbaycanda da müasir informasiya-kommunikasiya texnologiyalarının geniş tətbiqi bu sahədə davamlı kibertəhlükəsizlik tədbirlərinin həyata keçirilməsini gündəmə gətirir. Hər bir müasir dövlət kimi Azərbaycan da İKT-nin inkişafına diqqət yetirir, bu sahə ölkənin social-iqtisadi inkişafının prioritet istiqaməti elan edilib. Biz informasiya təhlükəsizliyi məsələlərində Avropa Şurası, Avropa İttifaqı, NATO, Beynəlxalq Elektrik Rabitəsi İttifaqı və digər beynəlxalq təşkilatlarla fəal qarşılıqlı əlaqələr saxlayırıq. O baxımdan sözügedən sahədə maarifləndirmə işlərinin gücləndirilməsi müsbət haldır. Neft-qaz sahəsində çalışan işçilərin bununla bağlı maarifləndirilməsi müsbət əhəmiyyətə malikdir. Bu, kibertəhlükələrin önlənməsində öz müsbət təsirini göstərə bilər”.
Vidadi ORDAHALLI
