Ruslan Atakişiyev: “Növbəti illərdə ümumdaxili məhsul istehsalının daha da artmasının şahidi olacağıq”
Naxçıvan Muxtar Respublikasında 2017-ci ilin yanvar-oktyabr aylarında 2 milyard 112 milyon 48 min 200 manatlıq ümumdaxili məhsul istehsal olunub. Naxçıvanın Dövlət Statistika Komitəsindən verilən məlumata görə, bu, 2016-cı ilin müvafiq dövrü ilə müqayisədə 1,7 faiz çoxdur. Hər bir nəfərə düşən ümumdaxili məhsulun həcmi 2016-cı ilin müvafiq dövrü ilə müqayisədə 4,6 faiz artaraq 4686,2 manata çatıb.
Naxçıvanda ümumdaxili məhsul istehsalı həcminin 2 milyard manatı ötməsi barədə fikir bildirən iqtisadçı- ekspert Ruslan Atakişiyev “Bakı-Xəbər”ə açıqlamasında qeyd etdi ki, son zamanlar Naxçıvan Muxtar Respublikasında aparılan sosial-iqtisadi islahatlar və iqtisadiyyatın inkişafı ilə bağlı həyata keçirilən işlər artıq öz bəhrəsini verir: “Görülən işlər tək Naxçıvanı deyil, bütün respublikanı əhatə edir. Sevindirici haldır ki, görülən işlər artıq öz töhfəsini verir. Naxçıvanın ümumdaxili məhsul istehsalının artmasına səbəb olub.
Onu da bildirim ki, Naxçıvan MR-dən Azərbaycanın digər bölgələrinə bir sıra məhsulların gətirilməsi, satışının təşkil olunması hallarına rast gəlinir. Bu kimi hallar ümumdaxili məhsul istehsalının artmasına səbəb olur.
Həmsöhbətimizin sözlərinə görə, Naxçıvanda turizmin müxtəlif növlərinin inkişafı iqtisadiyyata öz töhfəsini verir: “Naxçıvan müalicə turizminin inkişaf etməsi bu sahəyə müsbət təsir göstərir. Həmçinin, qida sektoru məhsullarının və spirtli içkilərin satışı ümumdaxili məhsulun inkişafına təsir göstərir. O cümlədən, Naxçıvan MR-in qonşu ölkələrlə geniş iqtisadi əlaqələrinin formalaşması, istər-istəməz, adıçəkilən bölgədə ümumdaxili məhsulda artımın baş verməsinə səbəb olur”.
İqtisadçının fikrincə, son zamanlar Naxçıvanın sosial-iqtisadi inkişafı ilə bağlı aparılan işlər nəticəsində növbəti illərdə Naxçıvanda ümumdaxili məhsul istehsalının daha da artmasının şahidi olacağıq.
Günel CƏLİLOVA
