Şahin Qafarov: “Sərgilər yalnız hansısa məhsulların təqdimatından ibarət deyil, sərgi keçirilən ərəfədə böyük toplantılar, qarşılıqlı müzakirə forumları, işgüzar görüşlər böyük əhəmiyyət kəsb edir”
Paytaxt Bakıda möhtəşəm “Bakutel-2017” sərgisi keçirilir. Məlumat üçün bildirək ki, builki sərgidə 20 ölkədən 192 şirkət iştirak edir. Nəqliyyat, Rabitə və Yüksək Texnologiyalar Nazirliyi, Beynəlxalq Telekommunikasiya İttifaqı, Azərbaycanda İxracın və İnvestisiyaların Təşviqi Fondu və Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının dəstəyi ilə keçirilən sərgidə ABŞ, Rusiya, Birləşmiş Ərəb Əmirlikləri, Çin, Finlandiya, Fransa, İsveç, Niderland Krallığı, Türkiyə və digər ölkələr təmsil olunurlar.
Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Leyla Əliyeva Bakı Ekspo Mərkəzində XXIII Azərbaycan Beynəlxalq Telekommunikasiya və İnformasiya Texnologiyaları Sərgisi - “Bakutel-2017” ilə tanış olublar.
“Bakutel-2017” sərgisinin əhəmiyyəti barədə danışan İKT sahəsi üzrə mütəxəssis Şahin Qafarov bizimlə söhbətində bildirdi ki, Cənubi Qafqaz regionunda bu sərgi yeganə olaraq Azərbaycanda keçirilir: “Əksər ölkələrin İKT sahəsində məşhur olan nümayəndələri, birinci şəxsləri “Bakutel-2017” sərgisində iştirak etmək üçün ölkəmizə gəliblər.
Həmsöhbətimizin fikrincə, təcrübə mübadiləsi, yeniliklərlə tanış olmaq və Azərbaycanın tanıtımı üçün gözəl fürsətdir. Burada tək sərgilər nümayiş olunmur, həmçinin, konfranslar, görüşlər təşkil olunur. Bu tip sərgilər ölkənin tanıdılması, ölkə İKT sektorunun uğurlarını təqdim etmək baxımından, eyni zamanda İKT sahəsində fəaliyyət göstərən şirkətlərin beynəlxalq şirkətlərlə işbirliyi qurub əməkdaşlıq yaratması üçün yaxşı bir vasitədir: “Sərgilər yalnız hansısa məhsulların təqdimatından ibarət deyil, sərgi keçirilən ərəfədə böyük toplantılar, qarşılıqlı müzakirə forumları, işgüzar görüşlər böyük əhəmiyyət kəsb edir”.
Sərgidə 20 ölkənin 190-dan artıq şirkəti təmsil olunub. Xarici şirkətlərin öz məhsullarını tanıtması və onlarla təcrübə mübadiləsi baxımından “Bakutel-2017” sərgisi yüksək qiymətləndirilməlidir.
Günel CƏLİLOVA
