Cahid İsmayıloğlu: “Bu istiqamətdə əməkdaşlığın daha da genişləndirilməsinə ehtiyac var”
Bakıda keçirilən “Bakutel-2017” sərgisi ilə bağlı Rusiyanın “Rossiya-24” telekanalında reportaj yayımlanıb. Prezident İlham Əliyev “Rossiya-24”ün müxbirinin sualını cavablandırıb.
Prezident İlham Əliyev bildirib ki, Azərbaycan texnologiyalar məsələsində Rusiya ilə tərəfdaşlığı genişləndirir. Dünya təhlükəsizliyinin yeni çağırışları əməkdaşlığın yeni sahələrinə çevrilir. Məsələn, kiberhücumlar: “Azərbaycan uğurla inkişaf edir, regional və beynəlxalq məsələlərdə onun rolu artır. Ölkəmiz böyük potensiala malikdir. Təbii ki, ölkəmiz belə təhlükə ilə üzləşə də bilər. Biz bütün tərəfdaşlarımızla əməkdaşlığa açığıq. Bu istiqamətdə Rusiya ilə də yaxşı əməkdaşlıq perspektivi mövcuddur. Biz bilirik ki, Rusiyada kibertəhlükəsizliyə böyük diqqət yetirilir. Buna görə, əlbəttə ki, bizim qurumlarımız rusiyalı həmkarları ilə müvafiq iş aparır”.
Reportajda o da deyilir ki, Bakı bir həftəlik informasiya texnologiyalarının paytaxtına çevrilib. Azərbaycanda Beynəlxalq Telekommunikasiya və İnformasiya Texnologiyaları Sərgisi və Konfransı açılıb. Tədbirdə 20 ölkədən, o cümlədən Rusiyadan 190-dan artıq şirkət iştirak edir. Bunlar mobil operatorlar, internet provayderləri, sistem inteqratorları və tanınmış brendlərin distribütorlarıdır.
Müəllif vurğulayıb ki, Azərbaycan həm də dinamik inkişaf edən ölkədir. Burada informasiya texnologiyaları sahəsində də təklif ediləsi çox şey var.
Bütövlükdə, Azərbaycanla Rusiya arasında texnologiyalar sahəsində əməkdaşlığın genişlənməsi iki olkə üçün nə kimi perspektivlər vəd edir?
Məsələyə münasibət bildirən informasiya-kommunikasiya texnologiyaları üzrə ekspert Cahid İsmayıloğlu buna müsbət prizmadan yanaşdı. Onun fikrincə, iki ölkə arasında texnologiya məsələlərində əməkdaşlıq Azərbaycanın xeyrinə olacaq: “Çünki Rusiya İKT sahəsində çox böyük təcrübəyə, zəngin bazaya malikdir. Ona görə də 2 ölkə arasında bu sahədə əməkdaşlıq bizim xeyrimizə işləyə bilər. Yəni sözügedən texnologiyaları paylaşaraq, tərəfdaşlıq edərək yeni texnologiyaları əldə edərik. Texnoloji sahədə olan yenilikləri daha yaxşı mənimsəyə bilərik. Bu istiqamətdə əməkdaşlığın daha da genişləndirilməsinə ehtiyac var. Məqsədəuyğun olan hal odur ki, kadr potensialının artırılmasında biz Rusiya təcrübəsindən istifadə edə bilərik. Bu baxımdan biz mütəxəssislərin yetişdirilməsində, eyni zamanda təcrübə mübadiləsində kadrlarımızı Rusiyaya göndərə bilərik. Bununla yanaşı, Rusiyadan bura kadrlar dəvət edə bilərik. Belə ki, onlar öz təcrübələrini Azərbaycanda bölüşə bilərlər. Müəyyən treninqlər keçirərək ölkəmizin kadr potensialının gücləndirilməsinə öz töhfələrini verə bilərlər. O baxımdan bu sahədə əməkdaşlığa müsbət yanaşıram. Hesab edirəm ki, bu, hər iki ölkənin xeyrinə olacaq”.
Vidadi ORDAHALLI
