Qadir Bayramlı: “Xarici ölkələrin istixanalarla bağlı təcrübəsi öyrənilməli və bizdə də tətbiq olunmalıdır”
Məlum olduğu kimi, Azərbaycan Respublikasının Prezidenti İlham Əliyev Xəzər rayonunun Zirə qəsəbəsində “BAKU AGROPARK”da görülən işlərlə tanış olub. İqtisadiyyat naziri Şahin Mustafayev və sahibkar Səməd Qurbanov dövlət başçısına aqropark barədə məlumat veriblər.
Bildirilib ki, hazırda ölkədə 3 min hektara yaxın sahədə mövcud və tikilməkdə olan istixana təsərrüfatları var. Bunun 2463 hektarı mövcud, 463 hektarı isə tikilməkdə olan istixana təsərrüfatlarıdır. Fəaliyyətdə olan istixana təsərrüfatlarından bu il avqustun 1-dək 302,3 min ton tərəvəz məhsulları yığılıb. İstehsal olunan məhsullar əsasən ixrac edilir. Görülən işlərin nəticəsidir ki, bu ilin 10 ayı ərzində tərəvəz ixracı ötən ilin müvafiq dövrü ilə müqayisədə 64,5 faiz artıb. Bu artım 259,7 min ton və ya 184,2 milyon dollar təşkil edib.
Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, sovet dönəmində Azərbaycanın inkişaf etmiş istixana sistemi var idi: “İstixana meyvə-tərəvəz və gülçülükdə özünü göstərirdi. Gülçülüklə məşğul olanlar böyük miqdarda məhsulu Azərbaycandan kənara apara bilirdilər. Keçmiş sovet respublikalarının gülçülük və ya meyvə-tərəvəz təminatında Azərbaycanın rolu böyük idi. Bəlli olduğu kimi, sonrakı dönəmdə böhran yaşandı. Sovet Birliyi dağılandan sonra ixtixana sahəsinə maraq azaldı və insanlar əvvəlki vəziyyətdə bu işlə məşğul ola bilmədilər. Ancaq bizim ölkədə bu sahənin inkişafı üçün çox böyük potensial var. Sadəcə, istixanaların böyük problemi istilik sarıdandır. İstixana işi ilə məşğul olanlar istilik problemini müəyyən yollar vasitəsilə həl etməlidirlər. İstixanaların yaşadığı problemlər həll olunarsa, ixrac üçün məhsul yetişdirmək olar. Bu sahənin inkişafı üçün bizdə imkanlar var”.
Həmsöhbətimiz onu da vurğuladı ki, hazırda istixanaların quruluşu dəyişib. Onların suvarma və isitmə sistemləri var. Xarici ölkələrin istixanalarla bağlı təcrübəsi öyrənilməli və bizdə də tətbiq olunmalıdır.
Q.Bayramlının sözlərinə görə, istixanalar təkcə Bakı və ətrafında deyil, rayonlarımızda da inkişaf etdirilə bilər. Bölgələrdə istixanaların olması çoxlu sayda iş yerlərinin açılması deməkdir.
Günel CƏLİLOVA
