Zakir Əhmədov: “Bu istiqamətdə işlər genişləndirilsə, ölkələr arasında daha çox emal və istehsal müəssisələri yaranacaq ki, nəticədə iş yerlərinin sayı artacaq”
İki gün əvvəl İstanbulda Türkdilli Dövlətlərin Əməkdaşlıq Şurasına (TDƏŞ) üzv dövlətlərin iqtisadiyyat nazirlərinin VII görüşü keçirilib. Azərbaycan, Türkiyə, Qazaxıstan, Özbəkistan və Qırğızıstan nümayəndələrinin iştirak etdikləri görüşdə ölkəmizi iqtisadiyyat naziri Şahin Mustafayevin rəhbərlik etdiyi nümayəndə heyəti təmsil edib.
İclasda Türk Şurasına üzv ölkələr arasında ticarət-iqtisadi əlaqələrin genişləndirilməsi, birgə iqtisadi layihələrin həyata keçirilməsi, ortaq sərmayə qoyuluşuna dair imkanların araşdırılması məsələləri müzakirə olunub.
Türkiyənin iqtisadiyyat naziri Nihat Zeybekçi əməkdaşlığın genişləndirilməsi üçün ticari-iqtisadi əlaqələrin inkişafının, sərmayə qoyuluşunun artırılmasının və yeni layihələrin həyata keçirilməsinin vacibliyini diqqətə çatdırıb.
Azərbaycanın iqtisadiyyat naziri Şahin Mustafayev çıxışında qeyd edib ki, Azərbaycanda Türk Şurasının ölkələri ilə ticarət, investisiya əməkdaşlığı, iş adamları arasında əlaqələrə böyük önəm verilir. 2017-ci ilin yanvar-sentyabr aylarında ölkəmizin Türk Şurasına üzv dövlətlərlə ticarət dövriyyəsi 2,1 milyard dollar təşkil edib. Nazir təşkilata üzv dövlətlərin qarşılıqlı investisiya yatırımı üçün böyük imkanlarının olduğunu və bu potensialdan yararlanmağı, tranzit potensialını reallaşdırmağı təklif edib. Bildirilib ki, ölkələrimizdən keçən tranzit marşrutlarına üstünlük verilməsi və yükdaşımaların həcminin artırılması məqsədilə Türk Şurası üzvləri və digər türkdilli dövlətlərlə əlaqələndirmə platformaları genişləndirilməlidir.
Ümumilikdə, Azərbaycanın qarşılıqlı investisiyaların genişləndirilməsi ilə bağlı təklifini ekspertlər necə dəyərləndirirlər?
Məsələyə münasibət bildirən ekspert Zakir Əhmədovun sözlərinə görə, TDƏŞ-də təmsil olan ölkələrin iqtisadi-ticarət potensialı böyükdür: “Ancaq reallıq ondan ibarətdir ki, sözügedən potensialdan hələ ki, maksimum istifadə edilmir. Hesab edirəm ki, bu yöndə əlaqələrin genişləndirilməsi istiqamətində işləmək lazımdır. Bu baxımdan investisiya mübadiləsinin genişləndirilməsi çox vacibdir. Bu, nəticə etibarilə, iqtisadi-ticarət əlaqələrinin genişlənməsinə, ən başlıcası isə, sözügedən dövlətlərin iqtisadi inkişafına təkan verəcək. Nəzərə almaq lazımdır ki, Azərbaycan Türkiyə iqtisadiyyatına ən çox sərmayə qoyan dövlətlərdən biridir. Faktiki olaraq Azərbaycan Türkiyənin neft-kimya kompleksi ilə bağlı çox böyük layihələr həyata keçirir. Həmin layihələr işə başladıqdan sonra Azərbaycan bundan böyük gəlir götürəcək. O cümlədən, Türkiyə Orta Asiya ölkələrində bir sıra investisiya layihələri həyata keçirir. Hesab edirəm ki, TDƏŞ ölkələri qeyri-neft sektoru sahəsində investisiya mübadiləsinin genişləndirilməsinə xüsusi önəm verməlidirlər. Çünki bu sahənin inkişaf etdirilməsinə daha çox ehtiyac duyulur. Bu istiqamətdə işlər genişləndirilsə, ölkələr arasında daha çox emal və istehsal müəssisələri yaranacaq ki, nəticədə iş yerlərinin sayı artacaq. Açılacaq iş yerləri dayanıqlı olacaq. O üzdən bütün ölkələr maksimum sərmayə mühitini yaxşılaşdırmaq istiqamətində səylərini artırmalıdırlar. Bu, investisiya cəlb etmək üçün son dərəcə önəmli amildir. Sərmayə nə qədər çox dövr etsə, bu bir o qədər iqtisadiyyatın inkişafına öz töhfəsini verəcək. Ona görə də bu kimi məqamlara diqqət etmək lazımdır”.
Vidadi ORDAHALLI
