Vahid Məhərrəmov: "Bazarda qeydə alınan bahalaşma təbii prosesdir" Murtuzəli Hacıyev: "Mövsümi məhsulların qiymətlərində dəyişiklik qeydə alınmayıb"
Bazarlarda mövsümi məhsulların qiymətinin bahalaşması haqqında məlumatlar səslənir. Bildirilir ki, əvvəlki illərə nisbətən bu il bazarlara bəzi məhsulların az gətirilməsi qiymətlərdə nisbətən artıma səbəb olub. Xüsusilə də pomidor və qarpızın mövsümü olduğundan, bu məhsullara tələbat daha çoxdur.
Redaksiyamıza edilən müraciətlərdə bildirilir ki, bahalaşma daha çox pomidorun qiymətində qeydə alınır. Belə ki, son 10 gündə bu məhsuluq qiyməti 80 qəpik - 1 manat 20 qəpik təşkil edib. Mövsümün ən çox istifadə edilən tərəvəzlərindən olan qarpızın isə kiloqramı 20-25 qəpikdən təklif olunur. Qeyd edək ki, ötən ilin müvafiq dövründə qiymətlər 18 qəpik təşkil edirdi.
Rəsmi statistikaya əsasən, əvvəlki ilin müvafiq dövrü ilə müqayisədə kənd təsərrüfatı məhsullarının istehsalı 2,2 faiz, o cümlədən bitkiçilik məhsullarının istehsalı 1,7 faiz artıb.
Məsələ ilə bağlı fikir bildirən Kənd Təsərrüfatı Nazirliyinin Mətbuat xidmətinin rəhbəri Murtuzəli Hacıyev qeyd etdi ki, mövsümi məhsulların qiymətlərində dəyişiklik qeydə alınmayıb: "Bazar liberaldır. Qiymətlər, demək olar ki, hər gün dəyişir və təklif-tələb əsasında formalaşır. Qarpızın kiloqramının 20 qəpik olması normaldır. Sizcə, kəndçi məhsulunu neçə manatdan satmalıdır? O da çəkdiyi xərci götürməlidir axı.
Nəzərinizə çatdırım ki, ötən il qarpızın kiloqramı 30-35 qəpik təşkil edib. Belə olan halda, bazarda bahalaşma olmayıb".
Aqrar sahə üzrə ekspert Vahid Məhərrəmov bizimlə söhbətində bildirdi ki, bazarda mövsümi tərəvəz və ya meyvələrin satış qiymətinin bahalaşması yanacağın qiymətinin artması ilə bağlıdır: "Bəllidir ki, rayonlardan paytaxta məhsullar minik maşınları vasitəsilə gətirilir. Benzinin qiymətində qeydə alınan artım bu işlə məşğul olan sahibkarların xərcini artırıb. Bu səbəbdən də sahibkarlar xərclərini kompensasiya etmək üçün qiyməti qaldırıb. Bazarda qeydə alınan bahalaşma təbii prosesdir".
Günel CƏLİLOVA
