Aydın Hüseynov: "Fondun əsas məqsədi neft amilinin iqtisadiyyata mənfi təsirlərinin minimuma endirilməsi, vəsaitlərin..."
Azərbaycan Respublikasının Dövlət Neft Fondu 1999-cu ildə yaradılıb. Fondun yaradılmasında əsas məqsəd ölkədə həyata keçirilməyə başlanan neft strategiyasının növbəti mərhələsi kimi neft yataqlarının xarici şirkətlərlə birgə işlənməsindən əldə edilən gəlirlərin toplanaraq səmərəli idarə edilməsindən, eyni zamanda, həmin vəsaitlərin qabaqcıl sahələrin inkişafına və ümumən ölkə üçün sosial-iqtisadi baxımdan mühüm əhəmiyyət kəsb edən layihələrin icrasına yönəldilməsindən ibarət olub. Qurum, praktiki olaraq, 2001-ci ilin iyunundan etibarən fəaliyyətə başlayıb. Həmin vaxt ARDNF-in hesabında 271 milyon ABŞ dolları məbləğində vəsait vardı.
2001-2015-ci illər ərzində Neft Fonduna ümumilikdə 124,90 milyard dollar, indiyə qədər isə 125 milyard dollar vəsait daxil olub.
Bu ilin altı ayında Neft Fondunun vəsaiti ilin əvvəlinə nisbətən 1643,9 milyon ABŞ dolları (büdcədənkənar gəlirlər - 1288,8 milyon ABŞ dolları daxil olmaqla) və ya 4,96 faizə qədər artaraq 34 milyard 790,9 milyon ABŞ dolları təşkil edib.
2017-ci ilin ilk yarımilliyində fondun investisiya portfelinin gəlirliyi 1,12 faiz təşkil edib ki, bu da ötən ilin müvafiq göstəricisi ilə müqayisədə 0,62 faiz bəndi çoxdur.
Ümumilikdə, indiyə qədər Neft Fonduna daxil olan 125 milyard dollar nə dərəcədə səmərəli istifadə olunub?
Sözügedən məsələni dəyərləndirən millət vəkili Aydın Hüseynovun fikrincə, neft gəlirlərindən səmərəli istifadə olunur: "Daxil olan gəlirlərdən səmərəli istifadə olunur. Dövlət Neft Fondu mütəmadi olaraq özünün investisiya siyasətini təkmilləşdirir və genişləndirir ki, bu da dövlətimiz üçün əlavə gəlirlərin əldə olunmasına imkan yaradır. Fondun əsas məqsədi neft amilinin iqtisadiyyata mənfi təsirlərinin minimuma endirilməsi, vəsaitlərin gələcək nəsillər üçün saxlanması məqsədilə düzgün yerləşdirilməsidir. Neft Fondunun köməyilə qısa müddət ərzində Azərbaycanda neft-qaz sektorunun özünəməxsus inkişaf modeli qurulub. Ölkəmizdə uğurla həyata keçirilən neft strategiyası vaxtilə xəyal kimi qəbul edilən bir sıra meqalayihələrin gerçəkləşməsinə səbəb oldu. Hazırda neftin satışından əldə edilən valyuta Dövlət Neft Fondunda cəmləşir və xalqımızın sosial-iqtisadi rifahının yaxşılaşdırılmasına yönəldilir. Neft Fondunun yaradılması ilə neft sərvətlərinin nəsillər arasında ədalətli bölgüsü, onların səmərəli və məqsədyönlü şəkildə idarə edilməsi üçün əsaslı təminat quruldu".
Vidadi ORDAHALLI
