Natiq Cəfərli: "İqtisadi aktivliyin zəifləməsi, müəssisələrin birləşdirilməsi və səhmlərin birləşdirilmə yolu ilə dövriyyədən çıxarılması qiymətli kağız bazarına təsir göstərən əsas amillərdən biridir"
Azərbaycanda qiymətli kağızlar bazarı 26 faiz kiçilib. Bu ilin I yarısında Azərbaycanın qiymətli kağızlar bazarının ayrı-ayrı bazar seqmentlərində artım müşahidə edilib.
Bu barədə Maliyyə Bazarlarına Nəzarət Palatasının açıqlamasında bildirilir. Məlumatda deyilir ki, hesabat dövrü ərzində qiymətli kağızların təkrar bazarı 54 % artaraq 2,975 mlrd. manatı ötüb. Korporativ qiymətli kağızlar bazarının 64 % azalması fonunda, dövlət qiymətli kağızlar bazarı 4,3 dəfə artıb. Yanvar-iyun ayları ərzində qiymətli kağızlar bazarı keçən ilin müvafiq dövrü ilə müqayisədə 26 % azalaraq 5,230 mlrd. manat təşkil edib.
Hesabat dövrü ərzində real sektor təmsilçilərinin və maliyyə institutlarının fond bazarı vasitəsilə öz kapitallarını artırmaq təşəbbüsləri korporativ qiymətli kağızlar bazarının səhm seqmentində əməliyyatların həcminin 83 % artaraq 1,047 mlrd. manat təşkil etməsinə səbəb olub. Ümumilikdə, səhmlərlə ilkin bazarda bağlanan əqdlərin məbləği əvvəlki hesabat dövrü ilə müqayisədə 2,9 dəfə artaraq 983 mln. manata çatıb.
Yanvar-iyun ayları ərzində qiymətli kağızlar bazarının ötən ilin müvafiq dövrü ilə müqayisədə 26 faiz azalması nə ilə bağlıdır? Məsələ ilə əlaqədar ekspertə müraciət etdik.
İqtisadçı-ekspert Natiq Cəfərli "Bakı-Xəbər"ə açıqlamasında qeyd etdi ki, son zamanlar Azərbaycanın qiymətli kağız bazarı zəif inkişaf edir: "Qonşu ölkələrlə müqayisədə Azərbaycanda qiymətli kağız birjasının fəaliyyəti, əməliyyatların intensivliyi həddindən artıq kiçikdir. Təəssüf ki, adıçəkilən sahə oturuşmuş instituta çevrilə bilmədi. Qiymətli Kağızlarla bağlı Dövlət Komitəsinin olmasına və birjanın onun nəzdində fəaliyyət göstərməsinə baxmayaraq, istənilən nəticə əldə olunmayıb".
İqtisadçının sözlərinə görə, iqtisadi aktivliyin zəifləməsi, müəssisələrin birləşdirilməsi və səhmlərin birləşdirilmə yolu ilə dövriyyədən çıxarılması qiymətli kağız bazarına təsir göstərən əsas amillərdən biridir. Son bir il ərzində bir çox səhmdar cəmiyyətlərin bağlanması və ya birləşdirilməsinin şahidi olduq. Bu da formal olan səhm dövriyyəsinin kiçilməsinə səbəb oldu. Ötən illərlə müqayisədə bu il qiymətli kağızlar bazarında azalmanın səbəbi ölkədə iqtisadi aktivliyin zəifləməsidir".
Günel CƏLİLOVA
