Rəşad Həsənov: "2017-ci ilin fevral ayından etibarən manatın stabilləşməsi ilə qənaətlərin güclənməsi bir sıra bankların kreditləşmə ilə bağlı..."
Azərbaycanda investisiyayönümlü kreditlərin həcmi 23 faiz artıb. Cəmi sərmayələrin strukturunda bank kreditlərinin payı illik müqayisədə 2,8 faiz bəndi artıb.
Bu ilin yanvar-iyun ayları ərzində maliyyə və kredit təşkilatları tərəfindən Azərbaycan iqtisadiyyatına sərmayə qoyuluşu 7 138,6 mln. manat təşkil edib ki, bunun da 848,5 mln. manatı və ya 11,9 %-i bank kreditləri olub. Beləliklə, bank kreditlərinin həcmində illik 23,0 % artım qeydə alınıb. Həmçinin, cəmi sərmayə qoyuluşunda bank kreditlərinin xüsusi çəkisi ötən ilin müvafiq dövrü ilə müqayisədə 2,8 faiz bəndi artıb.
Rəsmi statistikaya əsasən, cəmi sərmayənin 5 019,3 mln. manatı və ya 70,3 %-i müəssisə və təşkilatların vəsaitləri, 817,4 mln. manatı və ya 11,4 %-i büdcə vəsaitləri, 90,2 mln. manatı və ya 1,3 %-i büdcədənkənar fondların vəsaitləri, 328,5 mln. manatı və ya 4,6 %-i əhalinin şəxsi vəsaitlərinin payına düşür.
İnvestisiyayönümlü kreditlərin həcminin artması barədə fikir bildirən iqtisadçı-ekspert Rəşad Həsənov "Bakı-Xəbər"ə açıqlamasında qeyd etdi ki, ötən il Azərbaycanda kreditləşmə ümumiyyətlə dayanma səviyyəsinə çatmışdı: "2017-ci ilin fevral ayından etibarən manatın stabilləşməsi ilə qənaətlərin güclənməsi bir sıra bankların kreditləşmə ilə bağlı satışları yenidən başlatması ilə nəticələndi. Apardığımız müşahidələr göstərir ki, artıq bir sıra banklar bu istiqamətdə daha aktiv təbliğata başlayıb".
Həmsöhbətimizin sözlərinə görə, hazırda istehlak kreditləri, demək olar ki, ən risqli kateqoriyalar siyahısına daxildir. Çünki ötən dövr ərzində bank sektorunda baş verənlərin təhlili onu göstərdi ki, əsasən istehlak kreditləri ilə bağlı problemlər daha sərt formada özünü büruzə verir: "Eyni zamanda, Maliyyə Bazarlarına Nəzarət Palatası bu istiqamətdə qaydaları daha da sərtləşdirdiyi üçün, bankların kredit vermək imkanları məhduddur. Bu baxımdan kreditləşmə daha çox real sektora hədəflənmiş istiqamətdədir. Hazırda isə biz ilk artım işartılarını hiss etməkdəyik".
Günel CƏLİLOVA
