Zakir Əhmədov: "Ondan sonra bu işləri həyata keçirmək olar"
Azərbaycan Bolqarıstanın kənd təsərrüfatı bazarlarına geniş məhsul çeşidi ilə çıxmaq niyyətindədir. Bunu mətbuata açıqlamasında Azərbaycanın Bolqarıstandakı səfiri Nərgiz Qurbanova deyib. Səfirin sözlərinə görə, Azərbaycanın planlarında Bolqarıstanla əməkdaşlığı ticarət, kənd təsərrüfatı, turizm, İKT kimi sahələrdə genişləndirmək yer alır.
Diplomat nəqliyyat sahəsində əməkdaşlığın da mühüm olduğunu qeyd edib: "Hazırda konkret olaraq Qara dəniz-Xəzər dənizi-Fars körfəzi, Qara dəniz-Xəzər dənizi-Mərkəzi Asiya və Çin ölkələri marşrutları var. Amma Bolqarıstan "Transxəzər" beynəlxalq nəqliyyat marşrutunda da maraqlıdır".
N.Qurbanova qeyd edib ki, bu ilin oktyabr-noyabr aylarında iki ölkənin iş adamlarının iştirakı ilə biznes-forumun keçirilməsi planlaşdırılır.
Diplomat onu da əlavə edib ki, biz, həmçinin, "Made in Azerbaijan" məhsullarının Bolqarıstanda tanıdılmasında maraqlıyıq. Səfirin sözlərinə görə, Bolqarıstan eləcə də Azərbaycanın "Azerspace-1" peykinin imkanlarından yararlanmaq niyyətindədir.
Azərbaycan Dövlət Gömrük Komitəsinin məlumatına görə, iki dövlət arasında mal dövriyyəsi bu ilin yanvar-iyun aylarında 6,39 milyon dollar təşkil edib. Təbii ki, iki ölkənin mövcud potensialını nəzərə alsaq, mal dövriyyəsinin həcmini qənaətbəxş saymaq olmaz.
Maraqlıdır, Azərbaycanın Bolqarıstanın kənd təsərrüfatı bazarlarına geniş məhsul çeşidi ilə çıxmaq imkanlarını ekspertlər necə dəyərləndirir?
Məsələyə münasibət bildirən ekspert Zakir Əhmədovun fikrincə, prinsipcə, bu mümkündür: "Azərbaycan nə qədər çox xarici bazara kənd təsərrüfatı məhsulları çıxarsa, bu bir o qədər ölkəyə əlavə valyutanın daxil olması baxımından əhəmiyyətlidir. Nəzərə alsaq ki, Bolqarıstan Azərbaycana elə də uzaq ölkə deyil, o zaman bunun üçün müəyyən imkanlar var. Çünki sözügedən ölkə Qara dəniz sahillərində yerləşir. Kənd təsərrüfatı məhsullarını Gürcüstanın Poti limanına çıxarıb oradan dəniz yolu ilə Bolqarıstan bazarına çatdırmaq olar. Azərbaycanın hansı kənd təsərrüfatı məhsulları ilə Bolqarıstan bazarında təmsil olunmasına gəldikdə, fikrimcə, bu araşdırılmalıdır. Yəni hansı məhsula orada tələbat var, hansı məhsula tələbat yoxdur. Ondan sonra bu işləri həyata keçirmək olar. Çünki Bolqarıstanın özü də kənd təsərrüfatı ölkəsidir. Orada bir sıra tərəvəz və bostan məhsulları istehsal edilərək digər dövlətlərə ixrac olunur. Bu baxımdan bazarın öyrənilməsi vacib şərtlərdən biridir".
Vidadi ORDAHALLI
