Pərviz İlyasov: "İSMA Bikes" şirkəti bu həftə ərzində Naxçıvan Muxtar Respublikasında yerləşən "Cahan" alış-veriş mərkəzinə velosiped göndərəcək"
Məlum olduğu kimi, İsmayıllının Diyallı kəndi ərazisində "İSMA Bikes" velosiped istehsalı zavodu açılıb. "İSMA Bikes" bu ilin iyul ayından etibarən öz istehsalı olan velosipedlərin satışına başlayıb. Artıq "İSMA Bikes" şirkətinin istehsal etdiyi velosipedə maraq yüksəkdir.
Hətta tanınmış "Coco-Cola" şirkəti də Azərbaycan istehsalı olan velosipedi almaq üçün "İSMA Bikes" şirkəti ilə müqavilə imzalayıb.
"İSMA Bikes" şirkətinin yeni yaranmasına baxmayaraq, yerli istehsal velosipedlərin satışının nə vəziyyətdə olduğunu öyrənmək qərarına gəldik. "Synergy Group"un biznesin inkişafı departamentinin direktoru Pərviz İlyasov "Bakı-Xəbər"ə açıqlamasında qeyd etdi ki, Azərbaycan istehsalı olan velosipedlərin satışı normal şəkildə həyata keçirilir: "Bu sahədə müəyyən işlər görülür. Velosipedlərin satışı bilavasitə "İSMA Bikes" mağazası tərəfindən metronun "20 Yanvar" stansiyası yaxınlığında yerləşən velotrek ərazisində həyata keçiriləcək. Təxminən avqust ayının əvvəlindən etibarən bura velosipedin həm satışı, həm də xidmət mərkəzi olacaq. Avqust ayından etibarən dükanlarda yerli istehsal velosiped satışda olacaq".
P.İlyasov onu da əlavə etdi ki, "İSMA Bikes" şirkəti bu həftə ərzində Naxçıvan Muxtar Respublikasında yerləşən "Cahan" alış-veriş mərkəzinə velosiped göndərəcək: "İlkin mərhələdə Naxçıvana 100 ədəd velosiped göndəriləcək. 10-15 gündən sonra yenə velosiped göndəriləcək. Məlumat üçün bildirim ki, bizim onlarla birillik müqaviləmiz var. Naxçıvanın velosiped təminini "Cahan" alış-veriş mərkəzi öz üzərinə götürüb. Bakı şəhərində isə dillerlə danışıqlar gedir. 10 gündən sonra bizim velosipedlər Bakının mağazalarında olacaq. Hazırda bütün gücümüzü istehsala yönəltmişik ki, sifarişləri vaxtında yerinə yetirək".
Həmsöhbətimizin sözlərinə görə, 20 gündür "İSMA Bikes"in modellərinin tanıtımı olub: "Bu səbəbdən də xarici ölkələrə ixrac məsələsi bizim üçün aktual olsa da, hazırda bütün gücümüzü daxili tələbata yönəltmişik. Yerli tələbi qarşılayandan sonra xarici ölkələrə ixrac məsələsini aktuallaşdırıcağıq. Onu da deyim ki, biz Gürcüstanla danışmışıq. Həmin ölkədə 2 dükanın diller olmaq istəyi var. Hazırda danışıqlar gedir. Müəyyən şərtlərlə bağlı razılıq əldə olunsa, velosipedlər ixrac olunacaq. Təxminən bir aydan sonra xarici ölkələrə yerli istehsal velosipedlərin göndərilməsi məsələsi ilə məşğul olacağıq".
Günel CƏLİLOVA
