Vüqar Bayramov: "Bu, əməkdaşlığın gücləndirilməsi baxımından xeyli imkanlar yaradır"
Azərbaycan və Avropa İttifaqı arasında "Vahid aviasiya məkanına dair Saziş" üzrə danışıqlar artıq yekunlaşıb. Belə ki, Belçikanın paytaxtı Brüsseldə Avropa İttifaqının Nəqliyyat Departamentində "Avropa İttifaqı və onun üzv dövlətləri və Azərbaycan Respublikası arasında vahid aviasiya məkanına dair Saziş" üzrə danışıqların ikinci mərhələsi keçirilib.
Danışıqlarda Azərbaycan tərəfdən Dövlət Mülki Aviasiya Administrasiyasının direktoru Arif Məmmədovun rəhbərlik etdiyi nümayəndə heyəti iştirak edib. Nümayəndə heyətinin tərkibinə Dövlət Mülki Aviasiya Administrasiyasının və Azərbaycan Respublikasının Belçikadakı Səfirliyinin əməkdaşları, o cümlədən Xarici İşlər Nazirliyi və Ədliyyə Nazirliyinin təmsilçiləri də daxil olub.
Görüşdə hər iki tərəf bu sazişi imzalamaq niyyətini bildirib. Danışıqlar zamanı Azərbaycan tərəfinin irad, təklif və arzuları müzakirə edilib, bir sıra tam aydın olmayan məsələlərə dair izahatlar verilib. Görüşün nəticəsi olaraq protokol imzalanıb.
Danışıqların növbəti - 3-cü mərhələsinin Bakı şəhərində keçirilməsi qərara alınıb. O zamana kimi Azərbaycan Respublikasının digər nazirlik və komitələrinin rəyləri nəzərə alınaraq operativ şəkildə Avropa İttifaqı və üzv dövlətlərinə bildirilməsi və Bakıda keçiriləcək görüşdə artıq sazişin yekun variantının hazırlanması gözlənir.
"Vahid aviasiya məkanı haqqında Saziş" layihəsi üzrə danışıqların başlanması xüsusilə onunla əlamətdardır ki, ən yaxın perspektivdə Azərbaycan Respublikası ilə Avropa İttifaqı arasında "Əməkdaşlıq və tərəfdaşlıq haqqında" yeni Sazişin imzalanması gözlənir.
Bütövlükdə, Azərbaycanla Avropa İttifaqı arasında vahid hava məkanının yaradılmasının nə kimi əhəmiyyəti var?
Məsələyə münasibət bildirən iqtisadçı-ekspert Vüqar Bayramovun sözlərinə görə, bunun bir sıra əhəmiyyəti var: "Avropa İttifaqı Azərbaycanın strateji tərəfdaşlarından biridir. Prezident İlham Əliyevin Latviya və Polşaya səfərlərində də Aİ ilə əməkdaşlığın gücləndirilməsi məsələləri müzakirə olunan məsələlər sırasındadır. Bu kontekstdən yanaşanda vahid hava məkanının yaradılması nəqliyyat sektorunda, kommunikasiya sahəsində əməkdaşlığın gücləndirilməsi baxımından vacibdir. Nəticə etibarilə bu, əməkdaşlığın gücləndirilməsi baxımından xeyli imkanlar yaradır. Yəni imkan verir ki, əməkdaşlığı yalnız siyasi və iqtisadi sferada deyil, həm də kommunikasiya və nəqliyyat sahəsində inkişaf etdirmək mümkün olsun. Bu həm də inteqrasiyanın gücləndirilməsi baxımından vacibdir. Avropanın hava məkanı kifayət qədər böyük və şaxələnmiş məkandır. Ona görə də bunun əhəmiyyəti böyükdür. Azərbaycanın nəqliyyat sektorunda gəlirlərin artması, iş adamlarının bu imkandan istifadə etməsi baxımından razılıq vacib əhəmiyyətə malikdir. Eləcə də ölkə vətəndaşları daha uyğun tarif və şərtlərlə beynəlxalq nəqliyyat dəhlizindən istifadə etmək imkanı əldə edir".
Vidadi ORDAHALLI
