Zakir Əhmədov: "... uğurlu balanslaşdırılmış iqtisadi siyasət yeridərək bir sıra maraqları uzlaşdırır"
Azərbaycan, Türkiyə və Türkmənistan biznes nümayəndələrinin iştirakı ilə ilin sonuna qədər Aşqabadda keçiriləcək biznes-forum çərçivəsində əməkdaşlığın inkişaf etdirilməsi məsələlərinin müzakirəsi planlaşdırılır. Bununla bağlı diplomatik mənbədən verilən məlumata görə, biznes-forumun üç dövlət rəhbərinin görüşü ərəfəsində keçirilməsi nəzərdə tutulub. Biznes-forumun keçirilməsində məqsəd ticarət-iqtisadi əməkdaşlığı möhkəmləndirməkdir.
Qeyd edək ki, üçtərəfli biznes-forumun keçirilməsi barədə razılıq iyulun 19-da Bakıda Azərbaycan, Türkiyə və Türkmənistan XİN rəhbərlərinin görüşündə əldə olunub.
Görüşdə, həmçinin, tərəflər iqtisadi-ticari əməkdaşlığı gücləndirmək, sərmayə və ticarətin təşviq edilməsi üçün mövcud potensialdan istifadə etmək, bununla yanaşı, gömrük, enerji, nəqliyyat, telekommunikasiya, sənaye, kənd təsərrüfatı, elm, təhsil, mədəniyyət, turizm və ətraf mühit sahələrində birgə layihə və proqramların həyata keçirilməsi yolu ilə əməkdaşlığın daha da inkişaf etdirilməsinə dəstək vermək barədə razılığa gəlib.
Görünən odur ki, Azərbaycanın irəli sürdüyü uğurlu üçtərəfli əməkdaşlıq formatı öz müsbət nəticəsini verir. Bununla bağlı bir neçə nümunəni göstərmək olar. Məsələn, Azərbaycan, Rusiya, İran arasında olan əməkdaşlıq formatı. Belə ki, bu çərçivədə "Şimal-Cənub" nəqliyyat dəhlizi reallaşmaq üzrədir. Eyni zamanda, Azərbaycan, Gürcüstan, Türkiyə arasında olan əməkdaşlıq formatını göstərmək olar. Azərbaycan, Türkiyə və Türkmənistan biznes nümayəndələrinin gözlənilən görüşü bu yöndə növbəti uğurun göstəricisi sayıla bilər.
Maraqlıdır, bəs ekspertlər buna necə yanaşır?
Məsələyə münasibət bildirən ekspert Zakir Əhmədovun sözlərinə görə, Azərbaycan bu sahədə ən uğurlu orbitr rolunu oynayan dövlətdir: "Çünki Azərbaycanın iştirak etdiyi bütün bu kimi əməkdaşlıq formatları uğurlu nəticələr verir. Yəni təcrübə göstərir ki, üçtərəfli əməkdaşlıq bir sıra uğurlara yol açıb. Məsələn, Azərbaycan, Türkiyə və Gürcüstan arasında mövcud olan bu format sayəsində əvvəl enerji layihələri, sonra isə nəqliyyat layihələri ərsəyə gəldi. Azərbaycanın enerji daşıyıcılarının dünya bazarına çıxarılması məhz bu formatın sayəsində reallaşdı. Azərbaycan mürəkkəb və eyni zamanda strateji geosiyasi məkanda yerləşir. Buna rəğmən, uğurlu balanslaşdırılmış iqtisadi siyasət yeridərək bir sıra maraqları uzlaşdırır. Bu kontekstdə Azərbaycan, İran, Rusiya arasında uğurlu əməkdaşlıq formatı deyilənlərə əyani sübutdur. Məsələ ondadır ki, tərəflər arasında səmərəli iqtisadi-ticarət əlaqələri var. Elektrik enerjisinin mübadiləsi ilə bağlı üçtərəfli əməkdaşlıq var. Həmçinin, "Şimal-Cənub" nəqliyyat dəhlizi ilə bağlı ciddi iş gedir. Bu baxımdan Türkiyə, Azərbaycan, Türkmənistan arasında qurulan üçtərəfli format da gələcəkdə ciddi uğurların əldə olunacağından xəbər verir. Üç ölkənin iş adamlarının keçirəcəkləri biznes-forum növbəti uğurlara yol açacaq. Çox güman ki, bu, Türkmənistanın öz qaz resurslarını Azərbaycan vasitəsilə Avropa bazarına çıxarmasına yol açacaq". Vidadi ORDAHALLI
