Ruslan Atakişiyev: "Xüsusən də bu sahədə elm adamlarına diqqətin artırılması onların elmdə nailiyyətlər əldə etməsinə stimul verəcək"
Azərbaycan Prezidentinin 13.07.2017-ci il tarixli, 1530 nömrəli və 21.07.2017-ci il tarixli, 1560 nömrəli fərmanları ilə güzəştlə mənzil əldə etmək hüququ olan vətəndaşların kateqoriyaları genişləndirilib. Bu barədə Mənzil İnşaatı Dövlət Agentliyindən verilən məlumatda bildirilib.
Qeyd olunub ki, ölkə başçısının fərmanları ilə müvafiq qanunvericilikdə edilmiş dəyişikliyə əsasən, güzəştli ipoteka kreditini almaq və Azərbaycan Prezidenti yanında Mənzil İnşaatı Dövlət Agentliyinin sərəncamında olan mənzilləri güzəştlə əldə etmək hüququ olan vətəndaşların mövcud kateqoriyalarından biri genişləndirilib və daha bir yeni kateqoriya əlavə olunub.
Belə ki, "ən azı 15 il dövlət qulluğunda qulluq edən şəxs" adlı mövcud kateqoriya yeni redaksiyada, həmçinin, "ən azı 15 il dövlət qulluğunun xüsusi növündə xidmət keçən şəxsləri" də əhatə edəcək. Bununla yanaşı, yeni - "ən azı 3 il elmi vəzifədə işləyən elmi işçilər" kateqoriyası da əlavə olundu. Hər iki kateqoriyaya aid olan vətəndaşlar, yaşından və ailə vəziyyətindən asılı olmayaraq, güzəştlə mənzil əldə etmək hüququndan yararlana biləcək.
Mənzil İnşaatı Dövlət Agentiyi yenilənmiş kateqoriyalara aid bütün vətəndaşların müraciətlərini qəbul etmək məqsədilə "Güzəştli mənzil" elektron sisteminin təkmilləşdirilməsi işini davam etdirir.
Ümumilikdə, güzəştli şərtlərlə mənzil almaq istəyənlərin kateqoriyalarının genişləndirilməsini ekspertlər necə dəyərləndirir?
Məsələyə münasibət bildirən İqtisadi Resursların Öyrənilməsi Mərkəzinin sədri Ruslan Atakişiyev kateqoriyaların genişləndirilməsinə müsbət prizmadan yanaşdı: "Ölkədə elə kateqoriyalar var ki, güzəştli şərtlərlə mənzil almaq imkanından yararlana bilmir. Halbuki, onların da buna ehtiyacı var. Xüsusən də elmi sahələrdə çalışan şəxslərin bir çoxunun buna ehtiyacı var. Həmçinin, intellektual baxımdan elə insanlar var ki, onların ölkənin adının dünyada tanınmasında mühüm rolu var. Ona görə də sözügedən məsələyə diqqətlə yanaşanda, həmin kateqoriyaların genişləndirilməsi müsbət haldır və əhəmiyyətli məsələdir. Hesab edirəm ki, sosial mənzillərə sahib olmaqla bağlı kateqoriyaların genişləndirilməsi bununla məhdudlaşmayacaq. Gələcəkdə bunun daha da genişləndirilməsi istiqamətində iş aparılacaq. Xüsusən də bu sahədə elm adamlarına diqqətin artırılması onların elmdə nailiyyətlər əldə etməsinə stimul verəcək. Onlarda stimul yaradacaq və elmi işə daha məsuliyyətlə yanaşacaqlar. Bu da Azərbaycan elminin dünya səhnəsinə çıxmasına öz təsirini göstərəcək. Hesab edirəm ki, zamanla bu öz müsbət nəticəsini verəcək".
Vidadi ORDAHALLI
