Rəşad Həsənov: "Qaçqın və məcburi köçkünlərin sosial problemləri korporativ sosial məsuliyyətin bir parçası hesab olunmalıdır"
Məlum olduğu kimi, bu günlərdə Prezident İlham Əliyevin sədrliyi ilə Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclası keçirilib. İclasda çıxış edən dövlət başçısı bir sıra məsələlərə toxunub.
O, çıxışında məcburi köçkünlərin mənzil təminatının yaxşılaşdırılmasında sahibkarların iştirak etməsinin əhəmiyyətinə toxunub. Onun sözlərinə görə, sahibkarların sosial məsuliyyəti yüksək səviyyədə olmalıdır: "Masazırda, Sumqayıtda, Qaradağ rayonunda belə təşəbbüslər irəli sürülür. Onların arasında Qaradağ layihəsini xüsusilə qeyd etmək istərdim. Çünki bu bir yenilikdir, yeni təşəbbüsdür. Bu, özəl sektor tərəfindən inşa edilən böyük şəhərcikdir. Orada min köçkün ailəsi məskunlaşacaq və bu çox gözəl nümunədir.
Bu gün Azərbaycanda yaratdığımız şərait nəticəsində yüzlərlə, minlərlə sahibkar öz fəaliyyətini genişləndirir. Bizim sahibkarlarımız böyük imkanlara malikdirlər. Sahibkarların sosial məsuliyyəti də yüksək səviyyədə olmalıdır. Qaradağ rayonunda sahibkarlar tərəfindən öz vəsaitləri hesabına 1000 mənzillik şəhərciyin tikilməsi çox yaxşı təşəbbüsdür. Mən bunu bəyənirəm, alqışlayıram. Bu, bütün sahibkarlara nümunə olmalıdır. Mən bundan sonra sahibkarların fəaliyyətini o cümlədən bu göstəriciyə görə də qiymətləndirəcəyəm".
Sözsüz ki, sahibkarların bu işdə fəal iştirakı məcburi köçkünlərin mənzil şəraitinin daha tez yaxşılaşmasına təkan verə bilər. Bu zaman dövlətin üzərinə düşən yük azalacaq. Bu həm də digər sahibkarlar üçün gözəl nümunə olacaq. Ümumilikdə, nə etmək lazımdır ki, sahibkarlar bu işdə fəal olsun? Bunun üçün hansı addımlar atılmalıdır?
Məsələyə münasibət bildirən iqtisadçı-ekspert Rəşad Həsənov buna bir neçə prizmadan yanaşdı: "Korporativ sosial məsuliyyət deyilən bir yanaşma var. Dünyada böyük şirkətlərin timsalında onu müşahidə edirik ki, həmin şirkətlər həm fəaliyyət göstərdikləri bölgələrdə, həm də digər yerlərdə bu kimi sosial, ekoloji problemlərə yanaşmada daha həssas mövqe ortaya qoyur. Bu istiqamətdə sərmayələr, vəsaitlər ayırırlar və problemlərin həllində yaxından iştirak edirlər. Ona görə də Azərbaycanda da belə bir tendensiyanın başlaması məqsədəuyğundur. Azərbaycanda fəaliyyət göstərin böyük şirkətlərin, holdinqlərin fəaliyyətinə bu kimi yanaşmanın sirayət etməsi son nəticədə ölkədə dövlətin qaçqın və məcburi köçkünlərin həyat şəraitinin yaxşılaşdırılması istiqamətində fəaliyyətinə müəyyən qədər dəstək ola bilər. Faktiki olaraq hazırda biz müşahidə edirik ki, bu istiqamətdə müəyyən layihələrin icra edilməsi ilə bağlı işlər gedir. Eyni zamanda, faktiki olaraq, onu da nəzərə almaq lazımdır ki, qaçqın və məcburi köçkünlər 25 ildir ağır şəraitdə yaşayır. Bu günə qədər 200 min nəfərə qədər qaçqın və məcburi köçkünün mənzil problemi həll olunub. Ancaq xeyli sayda bu kateqoriyadan ibarət olan şəxsin mənzilə ehtiyacı var. Ona görə də bu istiqamətdə görüləsi işlər çoxdur. Hazırkı gəlirlər fonunda hökumətin bu istiqamətdə atacağı addımlar məqbul olmaya bilər. O baxımdan da Azərbaycanda fəaliyyət göstərən, bu ölkənin resurslarından istifadə edərək böyük gəlirlər əldə edən şirkətlər bu istiqamətdə müəyyən qədər təşəbbüskar mövqe ortaya qoymalıdır. Çünki qaçqın və məcburi köçkünlərin sosial problemləri korporativ sosial məsuliyyətin bir parçası hesab olunmalıdır. Ona görə də bu istiqamətdə bir ənənənin formalaşması məqsədəuyğun hesab olunur". Vidadi ORDAHALLI
