Vüqar Bayramov: "Gələcəkdə hər iki ölkə regional layihələrin də reallaşmasına töhfə vermək imkanlarına malikdir"
Məlum olduğu kimi, iyunun 21-22-də Moldova prezidenti İqor Dodon Azərbaycanda səfərdə olub. Ali qonağı Azərbaycan Prezidenti İlham Əliyev qarşılayıb. Azərbaycan lideri bildirib ki, ikitərəfli münasibətlərə əhəmiyyətli dinamika vermək vacibdir ki, çox iş görmək mümkün olsun.
Moldova prezidenti İqor Dodon isə Azərbaycana səfər etdiyi üçün şad olduğunu bildirib: "Bizim çox yaxşı ikitərəfli münasibətlərimiz var. Biz may ayında ölkələrimiz arasında diplomatik münasibətlərin qurulmasının 25 illiyini qeyd etmişik. Təəssüf ki, son 5 ildə hökumətlərarası komissiyanın iclasını keçirməmişik. Buna görə də çox ümid edirəm ki, bizim görüşümüz ikitərəfli münasibətlərimizə yeni impuls verəcək. Çünki potensial çox böyükdür. Hələ ki, bundan tam həcmdə istifadə olunmur".
Prezident İlham Əliyev əminliyini ifadə edib ki, bu səfər əməkdaşlığımızın möhkəmləndirilməsində çox mühüm addım olacaq. Qonağın səfərindən məmnun olduğunu bəyan edən dövlət başçısı bu səfərin əməkdaşlığımızın möhkəmləndirilməsində çox mühüm addım olacağını vurğulayıb: "Bunun üçün çox böyük potensial var. Bu gün münasibətlərimizin dinamik inkişafı üçün yaxşı təməl qoyulur. Həm siyasi dialoq sahəsində, həm də ticari-iqtisadi sahədə bizim münasibətlərimizə dinamizm vermək lazımdır".
Bütövlükdə, Azərbaycanla Moldova arasında ikitərəfli əlaqələrin genişləndirilməsi üçün hansı potensial var?
Məsələyə münasibət bildirən iqtisadçı-ekspert Vüqar Bayramov buna bir sıra prizmadan yanaşdı: "Moldova alıcılıq qabiliyyətinə görə Avropanın kiçik ölkəsi olsa da, iki ölkə arasında əlaqələrin genişləndirilməsi üçün potensial var. İki ölkə arasında iqtisadi əməkdaşlığın gücləndirilməsi imkanları genişdir. Moldova aqrar ölkə olaraq şərab istehsalı üzrə ixtisaslaşıb. O baxımdan bu ölkə Azərbaycana qida məhsulları ixrac edə bilər. Azərbaycan isə Moldovaya sənaye və yüngül sənaye məhsullarını ixrac etmək potensialına malikdir. Xüsusən də Moldovanın neft məhsullarına olan tələbatını nəzərə alsaq, bu sahədə əlaqələri genişləndirmək üçün imkanlr var. Çünki bu ölkənin neftə tələbatı yüksəkdir. Bu kontekstdən yanaşsaq, tərəflər arasında potensial var. İndiki məqamda Moldova Azərbaycana daha çox spirtli içki ixracını həyata keçirə bilər. Çünki Moldova sözügedən içkilər üzrə ixtisaslaşmış ölkədir və qiymət yetərincə ucuzdur. Daha ucuz qiymətə həmin məhsulların idxalını həyata keçirmək olar. Gələcəkdə hər iki ölkə regional layihələrin də reallaşmasına töhfə vermək imkanlarına malikdir. O baxımdan, iki ölkə arasında əməkdaşlıq imkanları var və tərəflər bu iqtisadi əməkdaşlıq imkanlarından səmərəli istifadə etməlidir".
Vidadi ORDAHALLI
